SC in NRC May 31-a peihfel hman turin ti

Supreme Court chuan Thawhlehni khan thuchhuah siamin, Assam hnenah National Register of Citizens (NRC) a kalpui mek chu May 31-ah zo hman ngei ngei turin a hriattir a, June 30 thleng hun pe tura Assam sorkar in a ngenna chu a hnawl a ni.

Justice Ranjan Gogoi bakah Justice Rohinton Fali Nariman-te chuan Assam sorkar ngenna chu an hnawlsak a ni. Attorney General K. K. Venugopal-an May 31-a NRC zawh hman chu thil theih loh a nih thu a sawi chu Gogoi chuan a pawm loh thu a sawi. Venugopal chuan court chu thil awmdan dik tak hre loah a puh a, Justice Nariman chuan hei hi chhang letin thil tam tak hriat loh an neih ngei thu leh an hriat loh thil chu an comment zui ngai loh thu a sawi thung.

Gogoi leh Nariman-te kaih­hruai bench chuan March- April thlaa panchayat and local body inthlan neih hun sawn tura ngen­na awm pawh an hnawl bawk.

Court thuchhuah chuan State Election Commission in inthlan hun tura ruahmanna a siam ang chu kaltlangpui a nih tur thu leh NRC pawh ruahman sa anga kalpui a nih tur thu a tarlang. Inthlan hun chungchangah hi chuan State Election Commission leh state sorkar inbe rem tura hriattir an nih thu an tarlang tel a ni.

Hetih lai hian state co-ordi­nator Prateek Hajela chuan mi vaibelchhe khat vel enfiah an la ngaih thu leh hemi hnuah hian mob-up round neih a la ngaih thu a hrilh a, court lam erawh chuan May 31-ah zo hman turin thupek a chhuah thung.