Arunachal in Statehood Day vawi 32-na lawm

Arunachal Pradesh chuan Thawhlehni khan Itanagar-ah state puitlinga hlankai an nih champha, Statehood Day vawi 32-na lawmna neiin he hunah hian Governor BD Mishra, Chief Minister Sarbanada Sonowal leh sorkar mi pawimawh tam tak an tel a ni.

Statehood Day lawmnaah hian Governor Brig (Dr) B.D. Mishra (Retd.) chuan thu sawiin, Arunachal Pradesh chuan bung thar a kai thu a sawi a, nasa taka hmasawnna tur kawng a zawh mek thu a sawi.

Mishra chuan economic-a hmasawnaa mumal tak nei tur chuan lungrual taka chen ho a pawimawh thu a sawi a, mi rintlak nih a pawimawh thu sawiin hnathawhna kawng engkima tihtak zeta thiltih a pawimawh thu a sawi bawk.

Governor Mishra chuan health sector lam a hmuh dan pawh a sawi a, medical officer-te chu an hnathawhna area-a ṭha taka thawk turin a ngen a ni. Mipuite chu Yoga practice tam tura ngenin hriselna ṭha nei turin faina kawnga nasa zawka hma la turin a ngen a ni.

Mi zawng zawng tana sorkar hna hmuh a harsat thu sawiin hemi a nih avang hian sorkar in skill development, self-employment leh entrepreneurship lama hma a lak nasat thu Governor chuan a sawi bawk.Ṭhalaite chu mahnia eizawnna kawng dap tur leh subsidy loan leh sorkar scheme dang te ṭangkai taka hmang turin a chah bawk a ni.

He hunah hian Mishra hian Ashoka Chakra awardee havildar Hangpan Dada hnenah “Arunachal Ratna” award hlanna a nei nghal a, Hangpan Dada hi a boral tawh avangin a nupui Chasen Lowang in a laksak a ni.

State Gold Medal mi 46 hnenah hlanna nei nghal bawkin State Silver Medal mi 51 hnenah a hlan nghal bawk a, mi pathum hnenah Chief Minis­ter’s Excellence Award in Civil Service hlan a ni bawk.