Tripura inthlanah Electoral law bawhchhia : CPI-M

Communist Party of India-Marxist (CPI-M) chuan Thawhlehni khan Election Commission hnenah Tripura inthlanah electoral law bawh­chhiat a nih thu sawiin, chhui chian an phut thu an thlen bawk.

CPI-M hruaitu senior Nilotpal Basu chuan Chief Election Commissioner O. P. Rawat chu Delhi-ah hmuin, Tripura inthlana thil mumal lo hrang hrang thleng chungchang a sawipui a, Tripura inthlan chu Representation of People Act, 1951 bawhchhiatna chiang tak a nih thu a sawi.

Basu chuan party state unit head Bijan Dhar-a lehkhathawn chu CEC hnenah hian a pe nghal bawk a, he lehkhathawnah hian February 17, inthlan hma chiah tlaiah khan engineer ṭhenkhatin Panisagar constituency-a ballot unit zawng zawng an hawn thu a inziak a, Dharmanagar-a ballot unit 12 leh Jubarajnagar constituency-a ballot unit pathum hawn a nih thu a inziak bawk a, hetih lai hian political party aiawh an awm lo niin a inziak bawk.

Hei vang hian CPI-M chuan Tripura inthlana VVPAT khawl lama buaina awm chu chhuichian an phut a ni.

Tripura Assembly inthlan hi Pathianni khan neih a ni a, vote 92% lai tla in India election history-ah record a siam nghe nghe a ni.