Manipur Forum in Meitei ST status pek tum dodal

All Tribal Rights’ Protection Forum, Manipur (ATRPFM) chuan Meitei/Meetei-te Scheduled Tribe list-a telh tura campaign-na awm chu an duh loh thu leh an dodal thu an sawi.

Scheduled Tribe Demand Committee, Manipur (STDCM)-te chu Meitei-te ST status pek an nih theihna tur hian an campaign a ni. Hei hi duh loin ATRPFM president Joseph Rongmei chuan tribal hruaitute, politician-te bakah mi pawimawh dang te chu STDCM campaign thlawp lo turin a ngen a, midang hriat loh agenda neia puhin, inhnialna chawkchhuak thei zawnga campaign-ah STDCM-te chu a puh.

ATRPFM chuan state sorkar leh Manipur State Commission hnenah STDCM-te duh anga Meitei-te Scheduled Tribe status pek chu pawmpui lo turin an ngen bawk.

ATRPFM chuan state sorkar chu community zawng zawng te duhdan leh inlungrual taka an chenho theihna tur ngaihtuah tur an nih thu a sawi a, lungrual leh buaina awm loa cheng ho tur chuan tribal leh non-tribal-te dikna chanvo chu zahsak a ṭul thu a sawi.

Forum chuan Meitei-te leh tribal-te chuan hnam tihdan phung hrang hlang an neih thu an sawi a, danglamna tam tak an nei niin an sawi bawk.