Hmarchhak biala hri leng dona atan Rs vbc 1,352.92 pe
Sorkar laipui chuan hmarchhak state hrang hrangten Covid-19 hri leng an dona kawnga hmanhmawhthlak bik thila an hman turin, Emergency Covid Response Package-II (ECRP) hnuaiah vaibelchhe 1,352.92 a pe.
ECRP hnuaia sum pek atang hian Assam chuan Rs vbc 812.46 a chang a, Arunachal Pradesh-in Rs vbc 141.94, Sikkim-in Rs vbc 21.85, Nagaland-in Rs vbc 62.46, Meghalaya-in Rs vbc 91.94, Manipur-in Rs vbc 85.95, Tripura-in Rs vbc 93.02 leh Mizoram-in Rs vbc 44.3 an chang a ni.
Union health minister Mansukh Mandaviya chuan Thawhlehni khan Assam state tlawhin, Guwahati-a hmarchhak state hrang hranga health minister-te nen hmarchhak biala hri leng dinhmun leh hri dona kawnga sorkar hmalak dante an thlirho a ni.
Meeting zawha press conference a neihah, minister Mandaviya chuan emergency fund atan Rs vbc 1,300 dawn pek a nih thu hi sawiin, hei hi damdawi leina tur te, oxygen supply tihpunna tur te, district-level hospital tinah general, ICU leh naupang ward-a khum dah siam belhna tur te a nih thu a sawi.
Minister chuan fund hi state-ten Covid-19 vaccine pek chhuah hna chak zawka an kalpuina tur atan pawh hman tel a ni dawn tih sawiin, sorkar laipui chuan state tinte vaccine mamawh zat pek zel a tum a ni, a ti.
Hmarchhak biala hri leng thawh hnihna thleng chungchangah, ram chhung hmun dang aiin a peak pawh a thleng har a, hei vang hian hri leng ziaawm hun tur pawhin hun a ngai rei ve leh deuh a ni, a ti. "Kar hnih liam ta chhung erawh chuan hmarchhaka hri kai thar zat pawh an tlahniam ṭan tawh a, state hrang hrangten theihtawp an chhuah avangin tunah pawh a ziaawm chho tawh a ni," tiin Minister chuan a sawi. Sorkar laipui chuan hmarchhak dinhmun chu a enpui reng dawn a, hri leng dona kawngah state-te chu a ṭul anga a puih zel tur thu sawiin, hri leng thawh thumna thleng tur atan state sorkar tinte chu an inbuatsaih ṭhat a beisei thu a sawi bawk.