Meghalaya : Governor convoy beih a ni
Meghalaya khawpui, Shillong-a helpawl hruaitu hlui, Chesterfield Thangkhiew thah a nih dana mipuiten lungawi lohna lantir a, tualchhung buaina chhuak vanga curfew puan a ni chungin Thawhlehni zing khan mi ṭhenkhatin Governor Satya Pal Malik-a motor chu beiin lungin an tawng.
Raj Bhavan official chuan Thawhlehni zing khan Governor Malik hi Delhi-a zin turin Assam airport-ah motor hian hruai a ni a, motor-te hi airport aṭanga an haw lam chu Shillong-a Mawlai area-ah mi ṭhenkhatin lungin an lo tawng tih a sawi. Motor ṭhenkhat chu a chhe nual a, mahse a chuang zingah hliam erawh an awm lo a ni. He thil thleng chungchangah hian complaint thehluh tum a nih thu a sawi bawk.
Pathiannia tualchhunga buaina a chhuah avang khan state pumah curfew puan a ni. Shillong khawpuia dan leh thupek kenkawhna kawnga police-te pui turin Ministry of Home Affairs chuan central armed police forces (CAPF) a dah belh bawk.
Meghalaya sorkar chuan Thangkhiew thah a nih danah judicial investigation neih a ni dawn tih a puang. Hei bakah hian boruak ṭha a awm theihna atana hma la turin deputy chief minister Prestone Tysong kaihhruai peace committee a din bawk a, committee-ah hian civil society organisation aiawh hrang hrangte an tel a ni. Peace committee hi nimin khan an inhmukhawm nghal a ni.
Meghalaya Human Rights Commission chuan chief secretary MS Rao hnenah Thangkhiew thih dan report kimchang chu ni 15 chhung ngeia thehlut turin Pathianni khan alo hriattir tawh bawk a ni.
Vawiin aṭangin curfew hlip dawn
Chief minsiter Conrad K Sangma chuan tukin zing dar 6 aṭang tlai dar 4 thleng Shillong khawpui hmun tam zawkah curfew hlih a ni tawh dawn tih a sawi. Hei bakah hian mobile internet service khapna pawh vawiin tlai dar 6 aṭangin tihtawp a ni bawk ang.
CM chuan ni hnih chhung curfew puan anih hnuah Shillong khawpui boruak chu a ṭha chho tawh tih sawiin, boruak ṭha a awm zel theihna turin sorkar chuan sakhaw hruaitu, senior citizen leh pawl hrang hrang aiawhte nen inbiakna an neih thu a sawi.
Mawlai area-ah police dah duh lo
Mawlai Town Dorbar (MTD) chuan East Khasi Hills district thuneitute hnenah Mawlai huam chhungah police dah lo turin a ngen. Police-te an hmuhin ṭhalaite chu an lungawi thei lo niin an sawi.
MTD coordinator Herlambok War chuan, "August 13-a HNLC hruaitu thah a nih danah mipuite an lungawi thei lo a, police uniform hat an hmuhin ṭhalaite thinrimna a chhuak thar leh ṭhin a ni," tiin a sawi. Mawlai area-ah thil duhawm lo thleng tur veng turin pawl hrang hrangten hma an lak zawk tur thu a sawi.