AP tan cheng vbch 925 ruahman : RK Singh

Union Minister of State(IC) for Power and New & Renewable Energy, Raj Kumar Singh chuan Nilaini khan Itanagar-a power sector review meeting a kaihruai a, he hunah hian state sorkar officer pawimawh eng emaw zat bakah Chief Minister Pema Khandu, State Minister for Power Tamiyo Taga leh Tourism Minister cum APEDA Chairman Jarkar Gamlin-te pawh an tel.

Union Minister chuan official kalkhawmte chu May 1, 2018-ah chuan state chhunga khaw awm zawng zawngah electric luhtir a nih vek theihna tura chak taka hma la turin a ti a, khaw tina in 10% tal chuan electric an nei ngei ngei tur a ni, a ti.

RK Singh chuan Arunachal Pradesh state chhunga power sector-in hma a sawnna turin cheng vaibelchhe 925 ruahman a nih thu a sawi a, heng pawisa te hi KV line hlui siamṭhat nan te, LT distribution line sei tak tak te 11 KV High Voltage Distribution System (HVDS)-a thlak na tur te a hman a nih tur thu a sawi bawk.

Singh chuan pawisa sanction chu a hmanna tur dik taka hmang turin Power department chu a chah nghal bawk a, hloh tlem thei ang ber tura hna thawk turin a chah bawk a ni.

Sorkar laipui chuan April 1, 2019-ah chuan in tinin 24x7 electric an neihna turin thu a lo tiam tawh tih sawiin Union Minister chuan 'load shedding' awm ṭhin pawh tihtawp a nih theih nana hma la turin department chu an ngen nghal bawk. Ram hmasawnna lantirna pakhat atan ramchhung chu 'No load shedding' a siam a ngai a ni, a ti.

Chief Minister Pema Khandu pawhin Arunachal Pradesh chu Prime Minsiter hmathlir tiṭhuanawmtu pakhat a nih thu sawiin, thingtlang khua electric la luh lohna khaw 900 zinga 600 chu Arunachal-ah a awm thu a sawi ve bawk a, electric khaw tina luhtirna tur hna thawktu leh contractor-te hnathawh chak loh thu te pawh a sawi ve bawk a ni.