BJP-ten Pathian lei thei emaw an inti : Rahul Gandhi

All India Congress Commitee (AICC) President Rahul Gandhi chuan Thawhlehni khan Meghalaya-ah Bharatiya Janata party (BJP) chu beiin Meghalaya-a biak in cheng vaibelchhe tam taka lei an tum a, an hlawhchham leh si a ni, a ti.

Rahul Gandhi hian inthlan awm mai tur atana campaign-in West Garo Hills-a Garobadha-ah thu a sawi a, Meghalaya Chief Minister Mukul Sangma leh AICC General Secretary CP Joshi-te pawhin an ṭawiawm a ni.

Rahul chuan BJP chuan MLA, MP leh hruaitu tam tak Meghalaya-ah an lei thu a sawi a, Congress party mi ngei pawh tam tak an lei tih a sawi bawk a, "Tunah chuan Pathian meuh pawh lei theiah an inngaih tawh a ni", a ti. Congress President chuan Garo, Jaintia, Khasi, Rabhas leh Tribal dangte hi lei tur an ni lo e, tiin BJP chetdan chu a dem thu a sawi.

Modi leh BJP sorkar chu an thutiama ding loah Rahul Gandhi chuan a puh bawk a, kum li kalta khan Modi leh BJP-a rinna nghatin an thutiam te avang khan an ring em em a, mahse an term tawp lam an thlen meuh chuan beiseina siam aiin beidawnna, hnathawh tur awm lo, hlauhna leh huatna bak an thlen lo a ni, a ti.

Punjab National Bank (PNB) scam chungchang pawh sawilangin Rahul chuan, Nirav Modi leh Vijay Malya scandal aṭang hian BJP sorkar chuan corruption a dan theih lohzia a chiang hle niin a sawi bawk.

BJP chuan pawisa an ngah hle nia sawiin, India rama mi hausa tak takin an thlawp tlat avangin sum an ngah thu a sawi a, India bank-a pawisa tam tak ru a ramdanga tlanchhia te pawhin BJP an thlawp thu Gandhi chuan a sawi bawk a ni.

Campaign neihnaah hian Meghalaya Chief Minister Mukul Sangma pawhin thu sawiin, Union Home Minister Rajnath Singh-an NCP leader Jonathone N Sangma thih chhanah Congress a puh chu a dem thu a sawi.

He campaign-naah hian mipui 5000 vel an pungkhawm a ni.