Meghalaya leh Nagaland-ah Prime Minister-in thu a sawi

Prime Minsiter Narendra Modi chuan nimin khan Nagaland leh Meghalaya-ah campaign neiin thu a sawi.

Prime Minister Narendra Modi hian Nagaland-a Tuensang district-ah thu a sawi hmasa a, Tuensang district hi Kohima aṭanga km 360 vela hlaa awm a ni. BJP hian hmarchhak state hrang hrangah hian hnehna chan an tum hle a, Assam, Arunachal Pradesh leh Manipur-ah sorkarna an siam hnu phei chuan hmarchhak state dangah pawh sorkarna siam tumin hma nasa takin an la a ni.

Tuensang district-ah hian assembly seat paruk a awm a, Nagaland bikah hian BJP leh party thar, Chief Minister hlui Neiphiu Rio kaihhruai Nationalist Democratic Progressive Party (NDPP)-te chu an ṭangrual dawn a, he district bika constituency pahnihah BJP hi an ding dawn thung.

Tuensang district-a thu a sawi zawh hnuah hian PM hian Meghalaya-a West Garo Hills district-a Phulbari khuaah thu a sawi leh a ni.

Meghalaya bikah hian inthlan hmaa a campaign neih vawi hnihna a ni a, December thla khan Shillong-a polo ground-ah thu a lo sawi tawh bawk.

Meghalaya assembly inthlan turah hian seat 60 awmah BJP hian seat 47-ah candidate an nei a ni.

Prime Minister in a tlawh tur khua te hi vehimna uluk taka kalpui a ni a, dan leh thupek khauh taka kalpui a nih theih nan central armed police force-te pawh an duty uluk hle tih police official-te chuan an sawi.

Meghalaya leh Nagaland hian February 27 hian Assembly inthlan an nei dawn a, March 3-ah result puan a ni thung ang. He state pahnihah hian Assembly seat 60 ve ve a awm a ni.