Nagaland leh Meghalaya-ah PM

Prime Minister Narendra Modi chuan Ningani khan Nagland leh Meghalaya tlawhin Bharatya Janata Party (BJP) tana campaign-na hun a hmang.

Nagaland-ah hian Tuensang district-ah thu sawiin, Prime Minister chuan mipuite chu BJP leh NDPP ṭangrual pawl vote turin a sawm.

Narendar Modi chuan Naga­land politics buaina chinfelna kawnga hma an lak mek thu a sawi a, tun aṭanga thla tam vak lo a ral leh chuan Naga buaina hi chinfel kan inbeisei tawh a ni, a ti. Modi chuan Naga buaina chinfel chu Nagaland mipuite pawhin an phu takzet tih a sawi bawk.

PM Modi chuan sorkar laipui chu Naga politics buaina chinfelna kawnga inbiakna nei duh an awm phawt chuan a inhawn reng thu a sawi a, covil society leh pawl dang pawh nise an welcome reng thu a sawi a ni.

Modi chuan Eastern Naga­land Peoples’ Organisation (ENPO)-te nen pawh inbiakna nei tura an inpeih reng thu a sawi a, ENPO-te chu an harsa hle tih a hriatpui thu leh ENPO area hmasawnna tura ṭanpuina a bika pek a nih thu thu a sawi bawk.

PM chuan hmarchhak hma­sawnna turin Nagalang-ah pawh National Highway km 500-a thui siam belh tura ruahmanna pawh siam a nih thu a sawi a, sorkar laipuiin Nagaland-ah in 8,500 sak an tum thu a sawi bawk a ni.

Nagaland khawpui, Kohima chu smart city-a siamna turin cheng vaivelchhe 1800 ruahman a nih thu a sawi bawk.

Ferbruary 27-a inthlan neih turah hian Nagaland-ah hian BJP leh party thar NDPP-te chu an ṭangrual dawn a, BJP bik hian seat 20-ah candidate an nei dawn a, NDPP hian seat 40-ah candidate an nei thung ang.

Prime Minister hian Naga­land-a thu a sawi zawh hnu hian Meghalaya panin Garo Hills-a Phulbari-a election rally-ah thu a sawi leh nghal a, Meghalaya mipuite hnenah Congress sorkar in mipuite an la thutak tawk lo niin a sawi.

Modi chuan Meghalaya mipui ten BJP an lawmna leh an thlawpna avanga a lawm thu sawiin, Meghalaya-a hnathawhna chance pe ve turin mipuite chu a ngen nghal a ni. Modi chuan sorkar ṭha tak an siam tur thu sawiin 'Sabka Saath, Sabka Vikas' policy hmanga sorkar an kaihhruai tur thu a sawi bawk.

Prime Minister chuan Me­gha­laya in hma a sawnna tur chuan khawl pahnih a mamawh nia sawiin, BJP kaihhruai state sorkar leh BJP kaihhruai sorkar laipui a mamawh niin a sawi.

Meghalaya Assembly inthlan chu buaina leh Congress sorkar lak aṭanga zalenna tur a nih thu sawiin, Chief Minister Mukul Sangma chu Meghalaya-a hmasawnna thlen loah a puh bawk. Mukul Sangma chu doctor ni mah se state chhunga health infrastructue chu a chhe hle tho tih sawiin hmeichhia-te chu ina naute nei tura nawr luih an nih thu a sawi bawk a ni.

Congress sorkar chuan km 1100-a thui siamna tur Pradhan Mantri Gram Sadak Yojana hnuaia cheng vaibelchhe 470 sanction-ah pawh 50% pawh an hmang thei lo niin PM chuan a sawi

Meghalaya-ah hian BJP hian thawhpui an nei dawn lo thung a, seat 47-ah nomination an file a ni.