Assam Assemby laiin Congress chhuak tau

Assam-a eptu pawl lian ber Congress MLA-te chu Ningani khan Assam Assembly neih naah Speaker in an adjournment motion thehluh sawiho a phal loh avangin an chhuak tau.

House-a rorel ṭan hma hian Congress hian Nilaini zana Guwahati-a sumdawng thah a nih chungchang sawiho turin adjournment motion chu Speaker Hitendra Nath Goswami hnenah an thehlut a ni.

Zawhna leh chhanna hun hawn laiin Congress MLA Abdul Khaleque chuan he thu hi rawn sawi chhuakin, Goswami chuan thutlukna chu dan anga siam a la nih dawn thu sawiin ṭhu turin thu a pe a ni. Zawhna zawh hun a tawp hnu hian Khaleque leh a thawhpui Kamalakhya Dey Purkayastha-te chuan hemi chungchang hi sawi chhuak lehin Speaker hian a hnawl sak leh tak siah chuan an lungawi ta lo a ni.

Khaleque chuan dan leh thupek nasa taka bawhchhiat a nih thu sawiin khawpui hmun laili taka sumdawng mi kahhlum a ni chu thil serious tak a nih thu a sawi.

Congress adjournment motion thehluh hnawl a nih tak siah chuan an duh loh zia lantir nan Congress MLA-te chuan House hi an chhuahsan a ni.

Goswami chuan thil hman­hmawhthlak-ah chuan adjourn­ment motion chu sawi ho tura pharh a nih ṭhin thu sawiin, state chhungah dan leh thupek a tlachhia tihna pawh a nih loh thu a sawi. Thil sawi hmanhmawhthlak a nih loh avangin Congress ho motion thehluh chu a hnawlsak thu a sawi bawk.