Manipur : Sipai beihnaa inhnamhnawih NIA-ten man

National Investigation Agency (NIA)-te chuan kum 2015, June thlaa Army convoy beih a nih ṭuma inhnamhnawih ve ni ngeia hriat an man tih official thuchhuah chuan a tarlang.

An man dan hi chiangkuang taka tarlan ni lo mah se NIA-te chuan kum 22 mi Moirangthem Nimaichand Meitei an man thu an sawi a, hel pawl Kangleipak Communist Party (Noyon) group zinga mi a nih tih an tarlang tel a ni.

Meitei hi June, 2015-a Manipur Chandel district-a Paraolen thingtlang khaw bula Army convoy lambun a nih ṭum khan a tel ve ngei niin NIA officiall thupuangtu chuan a sawi.

June, 2015 inbeihnaah hian hel pawlte hian Army mi leh sa 18 thatin midang 15 in hliam an tuar bawk a, Security force lam hian an beihletnaah hel pawl mi pahnih an kaphlum ve bawk a ni.

Hetih lai hian mi ṭhenkhat chuan NIA, Gorkha Rifles leh Bishnupur police-te ṭangkawp chuan February 3 khan Meitei hi Ningthoukhong area aṭangin an man daih tawh niin an sawi thung.