GNLA Chief Shira kaphlum

Special Force (SF-10) commando-te chuan Inrinni khan Meghalaya-a East Garo Hills district-ah Garo hel pawl hruaitu Sohan D Shira an kaphlum.

SF-10 commando-te hian East Garo Hills-a Sudurge area-a beihpui an thlaknaah Garo National Liberation Army (GNLA) pawl hotupa Sohan Dalbot Shira chu an kaphlum tih police official-te chuan an sawi a, hel pawl te nen an inkahnaa kaphlum an nih thu an sawi.

Meghalaya Police hotu Swaraj Bir Singh chuan SF-10 commando-te hian Sohan D Shira hi chawhma lam dar 11.50 khan an kaphlum tih a chian thu a sawi a, thuchiang zawk an ngaihchan mek thu a sawi bawk.

Shira hi pawikhawihna tam tak - tualthah, mi ruk bo, bomb tihpuah bakah Garo Hills vela buaina hrang hrang thlengah a inhnamhnawih tih police offical-te chuan sawiin, Nationalist Congress Party candidate Jonathone N. Sangma thah chungchangah pawh khan inhnamhnawiha rinhlelh a ni bawk a ni.

Chief Minister Mukul Sangma chuan Meghalaya Police-te chu chhuanawm a tih thu sawiin state hmelma Shira an thah avanga a lawmpui thu a sawi. Sangma chuan state chhunga muanna a awm theih nana police-te hnathawh chu a hlu a tih thu leh, inpumkhatna tichhe thei zawnga che misualte an beihlet dan chu hlu a tih thu a twitter-ah a ziak a ni.

Mukul Sangma chuan mipuite chu state chhunga muanna a awm theih nana an thawhho a hun tawh tih sawiin hmasawnna lam kawng zawh a hun tawh thu a sawi bawk.

SF-10-te hian Garo Hills-ah hian beihpui an la thlak chhunzawm zel a, Garo Hills-ah chuan security alert an puang a ni.

GNLA-te hian Meghalaya khaw­thlang lamah state hran "Garoland" ngiatin an hel a, police officer bang ta R. Sangma kaihhruaina hnuaiah hma an la a ni. Bangladesh hel pawl A’chik Special Dragon-te nen an thawk ho a, United Liberation Front of Asom (ULFA) leh National Democratic Front of Bodoland-te nen pawh beihpui an thlak ho fo tawh nghe nghe a ni.

R. Sangma hi July 30, 2012 khan India leh Bangladesh inrinaah man a ni tawh nghe nghe a, Shillong Jail-ah man mek a ni.