Nagaland Election Candidate zinga 59 % Crorepati
The Association of Democratic Reforms (ADR), Nagaland Assembly inthlan tura candidate-te affidavit enfiahtu chuan candidate zawng zawng zinga 59% chu crorepati, vaibelchhe nei tling an nih thu tarlangin an zingah hian JD(U) nominee Ramongo Lotha chu hausa berin cheng vaibelchhe 38.92 a nei tih an tarlang.
ADR-te hian candidate 196 zinga 193-te affidavit enfiahin heng zinga 114-te chu crorepati an nih thu a tarlang a, mi pathum affidavit an enfiah ve loh chhan hi Nagaland Chief Electoral Officer-a an public domain an clear loh vang niin a sawi.
Candidate zinga hausa ber, Lotha hi IAS retired niin cheng vaibelchhe 38.92 a nei a a ni.
Nagaland Chief Minister TR Zeliang chuan cheng vaibelchhe 3. 52 a nei a, NDPP hruaitu, Chief Minister pawh vawi thum lai lo ni tawh Neiphiu Rio chuan cheng vaibelchhe 15.37 a nei thung. Chief Minister hlui tho KL Chishi pawh a hausa pawl niin cheng vaibelchhe 38.20 a nei a ni.
Candidate zinga 46-te chuan cheng vaibelchhe nga aia tam neiin, 42-te chuan cheng vaibelchhe hnih an nei tling thung a, cheng nuai 50 nei tling 60 awmin cheng nuai 10 nei tling 26 an awm bawk.
Candidate 27-te chuan an pawisa hmuhna an affidavit-ah an tarlang lo a ni.
ADR in an tarlan danin candidate pathum chuan criminal case an nei a, NPD, NDPP leh BJP candidate-te an nih thu an tarlang bawk.
Candidate zinga pathum chu ziak leh chhiar thiam lo an ni a, pawl 8 pass mi 16 an awm laiin doctorate degree nei mi panga an awm thung. Kum 25-30 inkar mi pasarih awmin, kum 31-40 inkar mi 29 an awm bawk a, a bak zawng hi chu kum 40 chunglam vek an ni thung.