Arunachal Pradesh Zirlai pawlin lockdown pawhsei duh

All Arunachal Pradesh Students' Union (AAPSU) chuan hri leng vanga lockdown kalpui chu kar hnih dang pawtsei turin sorkar an ngen a, hei bakah hian state dang aṭanga hawte hri laka an him leh him loh test neih ṭhatsak leh vek turin an phut bawk. 

AAPSU vice president Meje Taku chuan state chhunga hri darh zel tur venna atan  state dang aṭanga hawte test neih ṭhat sak leh vek chu a ngai niin a sawi. "Test neih hmasaka negative, mahse an test nawn leh hnuah positive leh an awm fo a ni," tiin, hmun dang aṭanga hawte test neih ṭhatsak leh vek tur leh, home quarantine dan pawh khauh taka kalpui an phut thu a sawi a ni. 

Zirlai pawl chuan Changlang district-a Covid-19 positive hmuhte chu report-ah Arunachal mi anga tarlang lo a, refugee tia tarlang zawk tura an duh thu an sawi bawk. "Enkawlna chungchangah midangte enkawlna ang vek dawng turin dikna an nei a, mahse refugee an nih avangin state sorkar chuan Arunachal mi tiin a sawi tur a ni lo," tiin Taku chuan a sawi.