Meghalaya Peace Committee-ah Thangkhiew thlawptute tel duh lo

Meghalaya-a Hynniewtrep National Liberation Council (HNLC) helpawl hruaitu hlui, Cheristerfield Thangkhiew thah a nih avanga mipuiten lungawi lohna lantira tualchhung buaina a chhuah hnuah, Meghalaya sorkarin boruak ṭha a awm theihna tura hma la tura a din, Peace Committee-ah Thangkhiew thlawptu lamte an tel duh lo.

Thangkhiew hi August 13 khan Mawlai Kynton Massar venga a chenna inah police-ten an kaphlum a ni. Police-te chuan a chenna in an dap dawn hian Thangkhiew hian chemte nen a lo bei a, hei vang hian an kap niin an sawi. Mahse police-te thusawi hi tualchhung mipuite chuan pawm loin, inbeihna lem nia puhin lungawi lohna an lantir a, tualchhung buaina pawh a chhuah phah a ni.

State sorkar chuan boruak ṭha a awm theihna atan leh, Thangkhiew thih dan chhui chiang turin deputy chief minister Prestone Tynsong kaihhruaiin Peace Committee a din a, hetah hian sorkar lam aiawhte bakah Thangkhiew thlawptu lam pawh telh a ni. Mahse Thangkhiew thlawptute chuan inkahna thlenga inhnamhnawih, police officer pahnihte chu suspend an nih phawt loh chuan Peace Committee-ah tel ve an duh lo tih an sawi.

Pathiannia Shillong khawpuia mipuite lungawi lohna lantir a, buaina a chhuah avang khan Pathianni zan aṭangin curfew puan a ni a, boruakin ziaawm lam a pan chhoh avangin Nilaini khan thlahdul a ni. Mahse nimin tlai dar 5 aṭanga tukin zing 5 thleng curfew hi puan chhunzawm leh a ni.

State sorkar chuan tualchhung hotu, sakhaw hruaitu, civil society group leh organisation hrang hrang aiawhte pawh biain, khawpui chhunga boruak ṭha a awm theihna turin hma a la mek. Hemi rual hian Shillong khawpui hmun hrang hrangah dan leh thupek kengkawh turin security force ṭhahnem tak duty tir an la ni.

MHRC chairperson-in judicial inquiry ho dawn
Cheristerfield Thangkhiew thah a nih dan, judicial inquiry neih tur chu Meghalaya Humran Rights Commission (MHRC) chairperson, Justice (rtd) T Vaiphei-a'n a ho dawn tih chief minister Conrad K Sangma chuan a sawi.

Sangma chuan committee-in thil thlen dan an chhuinaah zalenna, leh thuneihna pumhlum pek an ni dawn tih a sawi bawk. Thangkhiew thahnaa inhnamhnawih, police officer pahnih suspend tura ngenna chu thil thlen dan chhuina inquiry report thehluh a nih hunah, mawhphurtute chungah action lak a ni ang, a ti.