Guwahati Airport hming thlak a ni dawn lo : Assam CM
Assam chief minister Himanta Biswa Sarma chuan Guwahati airport chu Adani Group kuta hlan a nih hunah pawh a hming thlak a ni dawn lo a, Lokpriya Gopinath Bordoloi International Airport tih hming a pu chhunzawm zel dawn tih a sawi.
Guwahati Airport hi Gujarat-based Adani Group kutah hlan a ni dawn a, hei hi duh loin eptu party bakah zirlai leh ṭhalai pawl hrang hrangte chuan lungawi lohna an lantir a ni. Thawhlehni leh Nilaini khan chanchinbu ṭhenkhatah the Adani Guwahati International Airport Limited (AGIAL) chuan non-aeronatical service atana advertisment an tihchhuah hnuin, airport hming pawh hi thlak an tum tih thuthang a awm zui a ni.
CM Sangma chuan, "Tumahin he aiport hming hi an thlak lo ang. Lokpriya Gopinath Bordoloi International Airport tih a ni chhunzawm zel ang," tiin Assam chief minister leh Narendra Modi chu India ram prime minister a nih chhung chuan airport hming hi thlak a ni dawn lo tih a sawi.
Guwahati airport hi Assam chief minister hmasa ber Gopinath Bordoloi hming chawia phuah a ni.
Nikum August 19 khan union cabinet chuan ram chhunga AAI airport pathum - Guwahati, Jaipur leh Thiruvananthapuram amite chu kum 50 chhung atan Adani Enterprise enkawl an remtihsak a ni.
Congress Rajya Sabha MP Ripun Bora chuan airport-a signboard-ah Adani International Airport tih a inziah thu leh, advertisement Adani International Airport hminga tihchhuah a nih thu a sawi. Airport hming tihdanglam a nih chungchang hi an sawichhuah pawhin Assam sorkar chuan a pha tlat niin a sawi. Sorkar chu Adani Group nena inremna an siamah airport hming hi a ngai put tir zel a nih chungchangte an sawi tel em tih a zawt.
Assam Jatiya Parishad (AJP) pawhin Gopinath Bordoloi hming thlak tumna a awm chuan a party-in eng kawng mahin an pawm dawn lo tih an sawi bawk. Advertisement-a hming an dah dan chungchang chu sawifiah turin Assam sorkar an phut tih an sawi.
Asom Jatiyatabadi Yuva Chhatra Parishad general secretary Palash Changmai chuan airport hi hming thar puttir tum a nih chuan, signboard pawh an tichhe zel dawn tih an sawi bawk.