Vawiinah Meghalaya leh Nagaland inthlang dawn

Meghalaya leh Nagaland Assembly inthlan chu vawiin-ah neih a ni dawn a, heng state pahnihah hian inthlan tur boruak hi a sang hle a, Pathianni khan campaign hun pawh khar a ni tawh a ni.

Meghalaya leh Nagaland-ah hian Assembly seat 60 ve ve awmin inthlan result hi March 3-ah puan a ni dawn a, heng state pahnihte result puan rual hian February 18-a inthlang. Tripura Assembly inthlan result pawh puan a ni ang.

Meghalaya:
Meghalaya bikah hian Congress in sorkarna kum 10 a chang tawh a, tun ṭum inthlan turah hian Bharatiya Janata Party (BJP) chuan hma nasa taka lain hnehna chan an tum ruh hle thung.

BJP hian Meghalaya-ah hian Congress hi paihthlak ngei tumin an bei a, Assam, Arunachal Pradesh leh Manipur-ah hnehna an lo chan tawh bawk avangin hmarchhak state-ah hian nasa taka ram zauh an tum a ni.Meghalaya-a election campaign nei tur hian Prime Minister Narendra Modi pawh vawi hnih lai a kal tawh nghe nghe a, PM bakah hian BJP National President Amit Shah, Union Home Minister Rajnath Singh, Defence Minister Nirmala Sitharaman-i bakah I&B Minister Irani-te pawhin campaign an lo nei tawh a, hei hian hnehna chang tura an tumruh zia a tilang chiang hle a ni. Anni bakah hian BJP official pawimawh eng emaw zat pawhin campaign an lo nei tawh bawk. Kristian tamna Meghalaya-a BJP in-charge atan hian Kerala mi Krirstian vek, Union Minister of State for Tourism KJ Alphonse chu ruat a ni nghe nghe.

Congress pawhin hnehna chan leh ngei tumin an Party National President Rahul Gandhi pawh tunhnaiah vawi hnih lai campaign neiin Meghalaya-ah hian a zin nghe nghe a, an media chief Randeep Singh Surjewala bakah MP Shahsi Tharoor-te pawh campaign in an zin tawh bawk a ni.

Meghalaya bikah hian Congress hian candidate 59 an nei a, BJP hian 47 an nei thung. Williamnagar Constituency-a ding tur NCP candidate Jonathone N. Sangma thah a nih avangin he constituency-a inthlanna neih tur erawh ṭhulh hrih a ni thung.

Candidate 370 awmin EVM hmanga inthlanna hi neih tur a ni a, vote thlak thei mi nuai 18.4 awmin polling station 3, 083-ah vote hi an thlak ang.

Nagaland:
Nagaland-ah hian BJP leh party thar Nationalist Democratic Progressive Party (NDP)-te chu an ṭangrual dawn a, inthlan boycott tumin buaina neuh neuh awm mah se inthlan hi kaltlangpui a ni dawn ta a, hemi a nih avang hian party hrang hrangin ṭan an la nasa hle a ni. Inthlan neih tur hian Naga political issue chinfelna kawnga sorkar laipui leh NSCN-IM-ten inbiakna an kalpui mek chu tibuai theia an ngaih avangin Nagaland party hrang hrang te leh Naga Tribal organisation-te chuan January thla khan inthlan boycott turin thutlukna an siam a, mahse a tuk lawkah he an thutlukna siam aṭang hian BJP an inhnuhdawh leh tak avangin party dang pawh hian an candidate tur te an puangzar ve leh ta ni.

Ṭangrual pawl bakah hian rorel lai Naga People's Front (NPF) leh Congress party-te chu party lian dang awm an ni a, anni party thum hian hnehna chan ngei tumin nasa takin an bei a ni.

Pathianni tlai dar 4 khan heng state pahniha campaign-na hun chu tihtawp a ni a, vawiin hian inthlanna ralmuang, dik leh felfai tak neih a nih theihna turin venhimna lam kalpui tur-te pawhin an duty-na tur hmun an thlengfel tawh bawk.

NDPP hian candidate 40 neiin BJP hian candidate 20 an nei thung a, Congress erawh chuan seat 18-ah chiah candidate an nei a ni.

Nagaland-ah pawh hian Meghalaya ang tho im seat 59-ah inthlanna kalpui a ni dawn a, Chief Minister vawi thum lai lo ni tawh Neiphiu Rio dinna bial Northern Angami -II constituency-a candidate pakhat zawk a inhnuhdawh avangin Rio hi chuhpuitu awm loin a tling tawh a, hemi a nih avang hian he constituency-ah hian inthlanna neih a ni dawn lo thung.

Nagaland-ah hian polling station 2,156-ah vote thlak a ni dawn a, Rio-a bial Northern Angmai-II constituency-a polling station 40 ah chuan vote thlak a ngai dawn ta lo a ni.

Nagaland-a candidate zawng zawng zinga 59% hi 'crorepati' an ni nghe nghe a ni.

Vote thlak thei mi 11, 91, 513 awmin heng zinga 50.50 % hi mipa niin 49.50% hi hmeichhia an ni thung. Service voter mi 5, 925 an awm bawk.

State pahnihah hian zing dar 7 aṭangin vote thlak ṭan a ni dawn a, tlai dar 4 thleng vote thlak theih a ni ang. Nagaland polling station ṭhenkhatah erawh tlai dar 3 thleng chiah hun hawn a ni dawn thung.