Tripura CPI-M-ten A vawi 8 nan hnehna chan leh ngei an inring

Tripura-a rorel lai Communist Party of India -Marxist (CPI-M) chuan Inrinni khan Assembly inthlan an neih zawh takah khan a vawi riat na turin hnehna an chan ngei an rin thu an sawi.

February 18 khan Tripura Assembly inthlan hi neih niin constituency 59-ah inthlan hi neih a ni a, March 3-ah result puan a ni ang. Constituency pakhatah CPI-M candi­da­te a thih avangin March 12-ah an inthlang thung ang.

CPI-M state secretary Bijan Dhar chuan party state committee meeting an neih zawh hnuah thu sawiin, an party report hrang hrang an ngaihthlak hnuah Tripura-ah hian a vawi riat nan Left Front chuan sorkar siam leh ngei tura inrintawkna an neih thu a sawi.

He meeting-ah hian Chief Minister Manik Sarkar pawh telin Dhar chuan sorkarna kan siam ngei ang, a bak chu thudang kan la rel thui vak lo, a ti.

Left Front hian 2013 Assembly inthlanah khan seat 50-ah hnehna changin vote tla zawng zawng aṭanga 52.32 % an hui a, 2016-a constituency pakhata by-poll election an neihnaah pawh hnehna an chang bawk a ni.

Dhar chuan Bharatiya Janata Party (BJP) leh a thurualpui Indegenous People's Front of Tripura (IPFT)-te chu buaina chawhchhuah tumah pumin state chhung hmun hrang hrangah tharum tawhna an thlen thu a sawi. Mipuite chu remna leh muanna vawng tlat turin a chah bawk.

CPI-M leh a thu­rualpui CPI, RSP leh For­­ward Bloc-te hi 1978 aṭang khan ṭangrualin inthlannah hian an lo tel tawh a ni.