Manipur : Loktak dil enfiah tur tlangzarh

Manipur Forest and Environment Minister Thounaoujam Shyamkumar chuan Inrinni khan Loktak dil endik tur, Institute of Bio resources and Sustainable Development (IBSD) floating laboratory a tlangzarh. He laboratory chesawn thei hian Loktak dil eco-system a endik dawn a ni.

Shyamkumar chuan floating researh laboratory hian Loktak dil-a tui quality a enfiah ṭhin dawn thu a sawi a, chhan hrang hrang vanga tui hi tihbawlhhlawh ṭhin a nih thu sawiin scientist-te chuan phumids aṭanga organic compound siam dan an zawn dawn thu a sawi.

Loktak dil enfiahna kawngah hian state sorkar pawhin theihtawp a chhuahpui dawn thu a sawi a, IBSD-ten an thil hmuhchhuah chu Loktak Development Authority (LDA) hnenah an pek dawn thu sawiin, hei hi lui bawlhhlawh zel venna tur a nih thu a sawi bawk.

IBSD Director Prof. Dinabandhu Sahoo chuan thla li zet he laboratory siam nan hian hun an hman thu sawiin he lawng hian darkar 24x7 hna a thawk dawn tih a sawi.