GNLA chief vuiliam

Security force-ten Inrinni-a an kahhlum tak Garo Nationalist Liberation Army (GNLA) Chief Sohan D. Shira (41) chu Pathianni khan East Garo Hills-a William­nagar-ah vuiliam a ni.

Post-mortem a nih hnuah Shira ruang hi Williamnagar-a a chhung­te hnenah Pathian­ni tlai dar 1.30 vel khan hlan a ni a, a vuinaah hian mipui tam tak an pungkhawm a ni.

Shira ruang hi a nupui inah nghah niin ṭawngṭaina leh vuina hun neih a nih zawh hnuah a pa Golen­dro T. Sangma an phum­na bulah an phum a ni.

Shira farnu, Aruna D. Shira chuan sorkar dodal lo zawnga khawsa tura a hrilh fo thu sawiin a rilru a hneh zawh loh thu a sawi. Aruna chuan sorkar leh security force-te chet danah a lungawi lo takzet a ni, a ti.

Shira hi Inrinni khan Special Force - 10 commando-te leh Megha­laya police ṭangrual ten East Garo Hills-a Dobu khaw bula Bawabgre thingtlang khuaah an kaphlum a ni. Shira lu manah hian sorkar leh police-te chuan cheng nuai 10 an phal thu pawh an lo sawi tawh a ni.