Manipur-ah mobile internet ni thum titawp dawn

Manipur-a Naga leh Kuki hnam inkara buaina chhuak vangin state sorkar chuan Thawhṭanni zan aṭang khan mobile internet/data service chu ni thum chhung atan a titawp. 

Kamjong district-a khaw inṭhenawm pahnih inkarah Thawhṭanni khan buaina nasa tak chhuakin, Chassad khuaah chenna in pawh eng emaw zat hal a ni. Buaina thlenna hmun hi Imphal khawchhak lam,  km 120 vela hlaah a ni. 

Deputy chief minister Y Joykumar  hoin ministerial team chuan buaina chhuahna hmun hi Thawhṭanni zan khan an tlawh nghal a ni. State sorkar chuan thil thlen dan chhui chiang turin committee a din nghal. 

Hnam pahnih inkara buaina hi Pathianni aṭanga inṭan nia sawi a ni. Pathianni khan misual ṭhenkhat, Naga nia rinte chuan Kuki hnamte lo an halsak a, Kuki te lungawi lo hian Chassad-a Naga mi ta, petrol station chu an hal sak ve nia sawi a ni. Thawhṭanni khan Imphal leh Ukhrul bhakah Kamjong khaw panna kawngpuite an dang zui bawk. 

Kawngpuia motor eng emaw zat dan beh an nih hnuah, Kamjong khuaa Naga hnamte chu a huhoin kawngpui dan tihtawp tumin an chhuak khawm a, hnam pahnihte hi intibuai zuiin Kuki khua, Chassad-a chenna in 50 chuang halsak leh tihchhiat sak an ni a, motor pawh eng emaw zat hal a ni bawk. Lunga an intawngnaah mi ṭhenkhatin hliam an tuar bawk a ni. 

Kamjong district thuneitu chuan curfew puangin, buaina chhuahna biala chengte chu an in chhuahsan lo tura tih an ni. District magistrate chuan pawikhawihna thlen thei hmanrua - tiang, lung leh puakthei thil lamte ken a khap bawk.