Meghalaya leh Nagaland-ah assembly inthlan nei

Meghalaya leh Nagaland-ah nimin khan assembly inthlan neih a ni a, zing dar 7 aṭangin polling station-ah vote thlak ṭan a ni a, tlai dar 4 thleng hawn a ni. Nagaland-a polling station ṭhenkhat erawh tlai dar 3 thleng hawn a ni thung.

State pahnihah hian con­stituency 59 ve veah inthlan hi neih a ni. Seat 60 ve ve awmin inthlan result hi March 3-ah puan a ni dawn thung. Venhimna khauh tak hnuaiah inthlan hi neih a ni.

Nagaland :
Zing dar 6.45 khan Tizit constituency-a polling booth number 20-ah chuan bottle grenade bomb a puak a, Police-te chuan mi pakhatin a ke ah hliam na tak a tawrh thu an sawi. He bomb hi polling booth-ah hian an vawm niin an sawi bawk. Vote erawh thlak chhunzawm zel a nih thu police-te chuan an sawi.

Nagaland CEO chuan polling booth 2, 56 zinga 1, 732-ah first hour aṭanga vote a tlak ṭan thu a sawi.

Northern Angami-II consti­tuency-ah chuan Neiphiu Rio chu chuhpuitu awm loa a tlin avangin vote thlak a ngai ve lo.

Nimin tlai dar 4 thleng khan vote nei zinga 75% in vote an thlak hman a ni.

Chawhma dar 11.10 khan Akuluto AC 31-ah NPF leh NDPP pawlte intibuaiin sialai an hmetpuak a, mi pakhatin nunna a chan a, midang pahnihin hliam an tuar bawk. Hetih lai hian Nagaland CEO Abhijit Sinha chuan inthlanna chu tluang taka kalpui a nih tho thu a sawi thung.

Meghalaya :
Meghalaya-ah hian Electronic Voting Machine (EVM) khawl chiang lo report a awm a, South Tura Constituency-a Pechon Memeorial High School polling booth-a EVM chu a chian loh avangin vote thlak tu te pawhin hun eng emaw chen a thlakna an nghak a ni. Salmanpara-a EVM pawh a chian loh thu report a ni bawk. Shillong East-a St. Anthony's School-a EVM leh VVPAT pawh complaint niin zingkar aṭangin vote thlak an ṭan thei lo a ni.

Meghalaya Chief Electoral Officer Frederick Roy Khar­kongor chuan polling station 3,025 zinga station 2, 221-ah first hour aṭanga vote thlak ṭan a nih thu a sawi.

Williamnagar constituency-ah erawh chuan he biala NCP candidate Jonathone N. Sangma chu thah a nih vangin inthlan hi neih a ni hrih lo thung.

Nimin tlai dar 4 thleng khan vote nei zinga 67% in vote an thlak hman nia report a ni a, Meghalaya Pradesh Congress Committe (MPCC) president James Lyngdoh chuan inthlanna kalpui a nih dan chu lawmawm a tih thu sawiin, boruak ralmuang tak hnuaia inthlan neih a nih thu a sawi.

Chief Minister Mukul Sang­ma pawhin Ampati polling sta­tion-ah vote a thlak a, Sang­ma hi Ampati leh Songsak constituency-ah a ding a ni.