Tripura : Polling station 6-ah vote thlak ṭha

Tripura-a polling station paruk-ah Thawhṭanni khan vote thlak ṭhat a ni a, vote 95% vel chu heng polling station-ah hian a tla tih Election Commission (EC) official-te chuan an sawi.

Heng polling station-ah hian vote thlakna khawl a chian loh avangin EC chuan February 18-a vote tla te kha a pawm lo a ni. Hemi a nih avang hian Thawhṭanni khan vote hi thlak ṭhat leh a ni a, vote hi a tla ṭha leh hle tho niin EC official-te chuan an sawi.

Vote thlak ṭhatna polling station-ah hian voter 5, 582 awmin EC lam chuan vote hi 95% vel lai a tla tih niin a sawi. Tripura Chief Electoral Officer (CEO) Sriram Taranikanti chuan vote thlak ni hian buaina leh harsatna an tawh loh thu sawiin, ralmuang taka vote hi thlak a nih thu a sawi bawk.

Vote thlak ṭhatna constituency zingah hian Tripura khawthlang lama Sepahijali district hnuaia Dhanpur Segmet a tel a, helai bial hi Communist Party of India-Marxist (CPI-M) candidate leh Chief Minister ni lai mek Manik Sarkar dinna bial a ni nghe nghe a ni.

CEO chuan March 3-a vote chhiar a nih hunah heng constituency inthlan ṭhatnaa vote tla te pawh hi chhiar tel ve nghal a nih dawn thu a sawi.

EC chuan Tripura CEO hnenah hian Assembly seat pali-a polling station pali-ah electorate awm zat leh vote tla zat record chu a inmil loh thu an hrilh a ni.

Taranikanti chuan heng consti­tuecy pali-ah hian EC chuan Retur­ning officer-te chu phalna la lo chuan result la puang ve lo tura a hriattir thu a sawi bawk.