Hmarchhak hmasawnna turin Sorkar in Niti forum a din

Union Minister Jitendra Singh chuan Pathianni khan hmarchhak state ten nasa lehzual zawka hma an sawnna turin sorkar laipuiin Niti forum a din thu a sawi.

Jitendra Singh chuan hmarchhak tana Niti forum din hian Ministry of Development of North Eastern Region (DoNER)-ah secretariat office a neih dawn thu a sawi bawk.

Minister chuan Niti forum chuan hmarchhak state pariata kawng hrang hranga hmasawnna awmna tur kawng a zawn dawn thu leh a thawh dawn thu a sawi.

DoNER Minister chuan hmarchhaka hmasawnna awmdan dinhmun pawh an enfiah dawn nia sawiin he forum hi Niti Aayog vice chairman leh DoNER minister-in an kaihhruia dawn niin a sawi bawk.

Hmarchhak tana Niti Forum din tharah hian Ministry of Road Transport & Highways, Railways, Power, Water Resources, River Development & Ganga Rejuvenation, New & Renewable Energy, Health and Family welfare leh Human Resource bakah Development and Environment, Forest and Climate Change aiawhte chu member an ni dawn tih a sawi.

Heng ho bakah hian hmarchhak state pariata Chief Secretary-te chu member an ni dawn bawk a, North East Council (NEC) secretary chu member secretary a nih dawn bakah MHA North East joint secretary leh helam kawnga thiamna bik nei mi eng emaw zat chu member an ni dawn bawk a ni.