Assam : Ethnic community paruk ST status pek tum dodal a ni

Co-ordination Co­mmi­ttee of the Tribal Organizations of Assam (CCTOA) chuan Thawhṭanni khan thuchhuah siamin an state chhunga community paruk hnena Scheduled Tribe (ST) status pek tura nia thuthang chu an duh loh thu leh, ST status-te chu hnam hnuaihnung zawkte hnenah chauh pek an duh thu an sawi.

CCTOA chuan poli­tics-a hamṭhatna duh vanga ST status chu inpek chi a nih loh thu sawiin Chief Minister Sarbanada Sonowal hnenah pawh Assam-a community paruk - Koch Rajbongshi, Tai-Ahom, Chutia, Moran, Motok leh Adivasi (tea-tribe)-te ST status pek tura ruahmanna awm chu hnawl tura an duh thu an thlen a ni.

All Assam Tribal Sangh leh CCTOA chief coordinatir ni bawk Aditya Khaklari chuan Rajasthan-a Meerna community chungchang sawichhuakin, 2010-a ST status pek an nih hnuah hnam lian leh hnam upa ni chunga reservation leh hamṭhatna an neih tho avangin UPSC hna 35% lai chu Meena ho hian an luah tawh thu a sawi a, rampuma ST awm zawng zawngah 1.6% chauh an ni leh lawi si niin a sawi.

Khaklari chuan India independence hnu kum 70 zet a liam tawh hnua heng community paruk te hi ST status pek leh an nih chuan gram sabha leh Lok Sabha-a ST-ten political representaion an neih pawh a tibuai vek dawn niin a sawi a a, zirna leh sorkar hnaa ST-in reservation a neih pawh a tibuai dawn niin a sawi bawk. Heng hnam tam lutuk hi ST status pek an nih chuan ST dinhmun luahsa te hamṭhatna dawn tur pawh an tibahlah vek dawn niin a sawi a ni.