Assam leh AP ramri buaina inbiakna hmangin chinfel theih : Dutta

Assam minister Ranjit Dutta chuan Itangar-a tribal festival a hmanpuinaah thu sawiin, Bharatiya Janata Party (BJP) in sorkarna an channa state pahnih - Arunachal Pradesh leh Assam state-te chuan hunrei tak ramri chungchanga buaina an lo neih tawh chu inbiakna mumal tak leh awmze nei tak hmangin an chinfel theih tur thu a sawi.

Assam Irrigation minister Ranjit Dutta chuan Assam Chief Minister Sarbanada Sonowal pawhin ramri buaina chungchangah Arunachal Chief Minister Pema Khandu nen inremna siam a duh thu a sawi a ni.

Thawhṭanni-a Nyokum Yullo festival a hmanpuinaah thu sawiin Prime Minister Naren­­dra Modi pawhin hmarchhak state inkara buaina neuh neuh awm ṭhin chu a ngaihpawimawh thu a sawi a, Sonowal pawhin a ngaipawimawh tih a sawi bawk. Assam CM chuan Naga­land CM TR Zeliang pawh hetiang kaihhnawihah tho hian inbiakna a neihpui tawh a ni, a ti.

Dutta chuan Assam leh Arunachal mipuite chu rem­na leh muanna awmna tur thawhpuiah a sawm a, kum 1978 hma zawnga rorelna pakhat, ‘bor Axom’ (Greater Assam) hnuaia an awm ṭhin thu sawiin heng hunlai aṭang tawh hian inlaichinna ṭha tak an neih tawh thu a sawi bawk.

Nyokum Yullo festival hi Nyishi community-te kut pawi­mawh tak niin thlai thar ṭha tak an neih theih avanga Pathian hnena lawmthu sawina kut a ni a, Dutta chuan Nyishi community-te chu an hnam tihdan phung an chhawmnun zel avanga fakin, kum lama upa zawk chu kum naupang zawkte chnenah an hnam tihdan phung chhawmnung zel tura zirtir turin a chah bawk a ni.