Meghalaya sorkarin sanitizer leh mask order

Meghalaya sorkar chuan khawvela Covid-19 leng mek avangin lo invenna tur kawng khat atan protec­tive equipment 50,000 leh hand sanitizer nuai ruk a order. 

Chief minister Conrad Sangma chuan House-a coronavirus chungchanga sawiho­naah hei hi sawi langin, sorkar chuan N95 mask 50,000, 3 ply mask nuai ruk, ventilator 32, hand sanitizer nuai ruk leh thermal scanner eng emaw zat a order tih a sawi. 

Sangma chuan India ram chhungah he hri kai hi an punchhoh zel avangin an state-a a luh ve lohna tura theihtawp chhuah reng a ngai tih a sawi. State sorkar chuan he hri lenna ram lo tlawhte hriselna dinhmun pawh uluk takin a enzui reng tih sawiin, control room, isolation ward-te siam a ni tawh tih a sawi a ni. 

China aṭanga rawn kir, zirlai 74-te dinhmun chu sorkar chuan a ngaih­ven reng a, an zinga 57-te chu ni 28 dah hran ni tawhin hri an kai lo tih hriatchian a ni tawh a, mi dang 17-te chu enthlak zui mek an la ni bawk, a ti.