Meghalaya-in CAA huam tir lohna tur resolution pass

Meghalaya Legislative Assemby budget session neih mekah, Thawhṭannia neih chuan Citizenship Amendment Act (CAA) chu an state huam tir ve lo tura phutna resolution an pass. 

Resolution hi chief minister Conrad K Sangma'n a pulut a, voice vote hmangin member-ten  an pass a ni. Eptu party Congress mem­ber-te chuan resolution siam chu an duh khawp lo tih sawiin, CAA inhuam tir loh ti zawnga siam lo a, CAA chu sut leh tura sorkar laipui nawrna siam zawk an duh tih an sawi. 

House-in resolution  a pass-ah hian, kum 2019, December 12-a siam, CAA-ah chuan 'Constitution-a Sixth Schedule hnuaia Assam, Meghalaya, Mizoram leh Tripura-a tribal area-te a huam tel lo ang' tih a nih thu an tarlang. Hetih lai hian an state-ah Sixth Schedule in a huam lohah erawh he dan hi hman a ni dawn a, hei hi duh loin state pumah CAA chu hman ve loh a, state leilung fate himna leh venhim zel chu an tum a nih thu an tarlang a ni. 

Eptu hruaitu, Mukul Sangma chuan CAA chu pawm theih a ni lo tih sawiin, sakhaw behchhana inthliarna siam hi Meghalaya leh hmarchhak bial pum mipuite chuan an pawm thei ngai lo ang, a ti. Assembly speaker Metbah Lyngdoh chuan budget session neih mek chu coronavirus, Covid-19 vangin Business Advisory Committee (BAC) emer­gency meeting chuan tihtawi a rel tih a sawi. March 19-ah vawi khat rorel inkhawm nei lehin, session hi titawp a ni tawh dawn tih a sawi a ni.