AP-in Pakke Tiger Reserve-a kawng siam tumna titawp

Arunachal Pradesh chief minister Pema Khandu chuan Pakke-Kessang district-a Pakke Tiger Reserve kaltlanga kawng siam tum chuan biodiversity leh ram sa thlengin a nghawng pawi thei dawn nia sawi anih avangin, kawng siamna tura hmalaknate a titawp rih. 

Km 40-a thui kawng siam tur hi East-West Industrial Corridor road siamna tur peng pakhat a ni a, he kawng hian Pakke-Kessang district-a Seijosa leh West Kameng district-a Bhalukpong a thlunzawm dawn a ni. Nimin zing khan chief secretary leh PWD commissioner-te meeting neihpuiin, CM chuan Tiger Reserve kaltlanga kawng siamna tura survey neih mek chu titawp turin a ti a ni. 

Khandu chuan Reserve-ah hian plant chi hrang 2,000, sava chi hrang 300, mammal chi 40, amphian chi 30 leh reptile chi 36 an awm tih sawiin, India rama sanctuary venhim ṭhat ber leh, Arunachal Pradesh state inchhuanna pakhat a nih thu a sawi.