HSP hotu Bhaichung Bhutia-a'n Sikkim tan ILP phut

Hamro Sikkim Party (HSP) hotu Bhaichung Bhutia chuan Sikkim state tan Inner Line Permit (ILP) system hman a phut a, chief minister Prem Singh Tamang chu Delhi-a central lam hruaitute a hmuh ṭuma hemi chungchang a sawichhuah loh avangin a dem tih a sawi bawk.

National football icon, Bhutia chuan hmarchhak state-a international border nei tam zawk chuan ILP hi an hmang a, Sikkim-ah pawh hman ve ngei a ṭul tih a sawi.

Bhutia chuan, "Kan CM-in centre hruaitute a hmuh ṭuma ILP chungchang a ngaihtuah tel lo hi a vanduaithlak hle a ni," a ti. ILP aiah Sikkim mipuite humhalhna, Article 371F tihdanglamna tur chungchang inhawng takin a sawipui zawk a ni, a ti.

Sikkim Krantikari Morcha (SKM) sorkar chuan engmah sawichiang loin, Article 371F leh Revenue Order Number 1 siamṭhat hi a lo remti tawh a ni, tiin a sawi.

Bhutia chuan Sikkim mipuite chuan hemi chungchang kimchanga an hriat ve a ṭul thu sawiin, Chief Minister chuan Delhi a tlawh ṭuma memorandum a thehluh hrang hrangte chu a puangzar tur a ni, a ti. Hei bakah hian state sorkar chuan Sikkim-a 'One Nation, One Ration Card' hman chungchang chu ngaithuah ṭha leh tura sorkar laipui nawr turin a phut bawk.