AP-in airport pathum dang neih belh dawn Tezu airport-ah commercial flight thlawh tir ṭan

Arunachal Pradesh chief minister Pema Khandu chuan sorkar laipui chuan an state-ah airport pathum, West Kameng district-a Dirang-ah, Dibang Valley-a Annini leh Upper Subandisi-ahte siam belh a tiam tih a sawi.

CM Khandu chuan tun thla tir lama New Delhi-a union civil aviation minister Jyotiraditya Scindia nen an inkawm ṭumin airport siam belh hi a tiam thu a sawi. Heng airport siamna tur ram pawh buaipui ṭan mek a ni a, an tihfel theih veleh aviation ministry-ah an thawn dawn tih a sawi a ni.

AP hian airport pahnih, Lohit district-a Tezu leh East Siang-ah Pasighat hmunah a nei mek a ni. Itanagar bul, Hollongi-a Greenfield Airport siam chu nakkum August thlaah zawhfel beisei a ni bawk. Heng bakah hian advanced landing ground (ALG) chu Vijaynagar (Changlang), Mechuka (Shi-Yomi), Walong (Anjaw), Tuting (Upper Siang), Ziro (Lower Subansiri) leh Tawang (Tawang)-ah a awm bawk.

Ningani khan PM Khandu chuan Lohit district-a Tezu airport aṭanga commercial flight hmasa ber chu a vai liam. Airport aṭang hian Flybig Airlines thlawhtheihna chu Guwahati-a Lohit district panin a thlawk chhuak a ni. Commercial flight vai liamnaah hian state civil aviation minister Nakap Nalo, Arunachal East MP Tapir Gao, MLA Dasanglu Pul, AAI regional manager leh mi pawimawh dangte an tel. Flybig hian ATR 72 aircraft thlawh tirin, seating capatity 72 a nei. Flybig hian UDAN scheme hnuaiah Guwahati-Pasighat, Pasighat-Shillong, Guwahati-Tezu, leh Tezu-Imphal inkara commercial flight service turin sorkar laipui aṭangin phalna a hmu tawh a ni.

Tezu airport-a flight service neih hmasak ber chu kumin May 24 khan niin, Pasighat leh Guwahati inkarah thlawh tir a ni, Ningani ami hi a ṭum hnihna a ni.