Assam-ah Post-Covid Hospital siam dawn

Assam sorkar chuan state khawpui, Guwahati ah Covid hri kai dam tawh, taksa lama harsatna la neite enkawlna bik tur Post-Covid Hospital a hawng dawn.

Kalapahar-a hospital siam tur hi health minister Keshab Mahanta pawhin a hmunah a tlawh tawh a, tunkar hian hawn hman tum a ni. He facility hi Guwahati Medical College and Hospital (GMCH) hnuaiah a awm ang.

Covid hri kai dam tawhte zingah taksa lamah harsatna leh insawiselna nei an tam avangin, state sorkar chuan heng mite enkawlna tur bik siam hi a tum ta tih official-te chuan an sawi.

August 31-ah Guwahati-a chengte vaccine pek hman vek tum

State sorkar chuan vaccine state khawpui awmna, Kamrup Metropolitan district-a cheng, Covid vaccine la thei chin chu August 31-ah chuan vaccine pek kim hman vek a tum.

Health minister chuan district chhungah hian vaccine pekchhuah hi polling booth level-a kalpui a ni dawn tih sawiin, field team-te chuan vaccine la lote data pawh an lakhawm mek a ni, a ti. District-ah hian polling booth 1,204 a awm a, voters' list-a behchhana atan an hmang dawn tih sawiin, voters' list aṭanga chhutin vaccine la thei chin hi mi nuai 15 vel awmin, an zinga a tam ber chu Guwahati khawpuia cheng an ni, a ti. District chhungah hian mi nuai 14 velin vaccine an lak tawh thu a sawi bawk.

Mahanta chuan state pum huapin hri kai thar chuan tlakhniam lam pan mah se, Kamrup Metropolitan district bik erawh ngaihven zui a la ngai hle tih a sawi. Guwahati khawpuiah hri leng hi thunun thuai a nih loh chuan, sorkarin khuahkhirhna khauh zawk a siam leh a ngai dawn a ni tiin Mahawtna chuan a sawi.