Guwahati-a diesel bus thlak vek tum

Assam sorkar chuan kum khat chhungin Guwahati khawpui chhunga diesel bus chu electric and compressed natural gas (CNG) a thlak vek tum a nih thu a puang.

Chief minister Himanta Biswa Sarma chuan a kaihhruai BJP sorkarin ni 100 a tlin puala Zirtawpni liam taa press conference a neihah he thu hi a puang a ni. CM chuan state cabinet-in Guwahati khawpui bik tan CNG bus 100 leh electric bus 200 leina tur chu a pawm tawh thu sawiin, hengte hi diesel bus thlakna atan hman a ni dawn tih a sawi. "Carbon tihchhuahte titlem turin mitinin hma an la a, Assam pawhin a theih angin hma a la ve dawn a ni," a ti.

Sarma sorkar chuan Covid khuahkhirhna avanga hun rei tak hna thawk mumal thei loa awm, bus oprerator chhawmdawlna pek a nih tur thu a puang bawk. Bus driver, conductor leh helper-te chu Rs 10,000 theuh pek an ni ang. Hri leng thawh hnihna thlengah sorkarin khuahkhirhna siam a, thla thum chhung district-te inkalpawh khapna a siam chuan bus transport sector hnuaia mi 60,000 vel a nghawng a ni.

Chief Minister chuan an state-a Class 9 leh 10 ah Assam history leh geography chu compulsory subject an ni tawh dawn tih a puang bawk. "Eng stream-ah pawh, zirlaite chuan Class 10 thlengin Indian history leh geography leh Assam history leh geography chuan an zir tel ngei ngei a ngai tawh ang," a ti.