Hmarchhak state leh Myanmar-ten inlaichinna tinghet

Mandalay Region Chamber of Commerce and Industry (MRCCI) leh hmarchhak sumdawng mite chuan Inrinni liamta khan ram pahnihte insumdawn tawn dan chungchangah inbiakna neiin, Mandalay company-te leh hmarchhak sum­dawng company-te chuan Memorandum of Under­standing (MoU) an ziak.

Consul General of India, Nanda Singh Bhaisora chuan ram pahnih ten insumdawn tawnna lama hmasawnna an neih theih nan leh hmarchhak state thilsiam chhuahte tihlar leh tihhmasawnna tur atana meeting hi nei an nih thu a sawi. India thilsiam chhuahte chu Myanmar mipuite pawhin an duh hle niin a sawi bawk.

Nanda chuan handloom leh weaving hmanga sumdawnna te, handicraft mai bakah thei, hmarcha, masala,, thlai hrang hrang bakah mau hanga thil siam chhuahte hmanga insumdawn tawnna tur an sawi ho tih a sawi. Ram pahnihte hian inanna tamtak an neih bawk avangin border trade pawh tihchangtlun lehzual an tum thu a sawi a, "Kan ethnic attire pawh a inang a ni", a ti.

MRCCI vice-chairman thar U Aung San Win chuan India sumdawnna tihhmasawnna tur hian Mandalay chu a pawimawh hle niin a sawi a, India nena sum­dawnna kawnga thawh ho chu ṭha an tih thu sawiin anni lam pawhin nasa taka hlawkpui an tum thu a sawi bawk. Economy ṭhanna tur chuan private sector tihchangtlun a pawimawh thu a sawi bawk.

Myanmar-a India Ambassa­dor, Gautan Muko Padia chuan India hmarchhak state-te chuan nasa taka hma an sawn thu a sawi a, hemi a nih avang hian Mynamar mai bakah Lao, Thailand leh Vietnam ram te nen pawha insumdawn tawnna neih an tum zel thu a sawi. India leh Myanmar inlaichhina chu nghet tak a nih thu sawiin hun rei tak kalta aṭang tawha inlaichinna an neih thu a sawi bawk. Ram pahnihte hian sumdawnna mai bakah tourims service lamah pawh theihna tam tak an neih thu a sawi bawk a ni.