Meghalaya-a vote 84.86% a tla

Meghalaya Assembly inthlana vote thlak zat report chu tihchian a ni ta a, vote tla zat hi 84.86% a tling.

Inthlanni tlai dar 4 thlenga report thehluhah kha chuan 67% chiah ni mah se Garo Hills leh Jaintia Hills-a hmun kilkhawr deuha awm ten report an thehluh kim hnuah vote tla zat hi 84.86% a tling ta a ni.

State Chief Electoral Officer F.R Kharkongor chuan Nilaini khan Shillong-ah report kimchang hi tarlangin district zingah South West Garo Hills-ah vote hi a tla ṭha ber a, 91.15% a tling pha a ni. A dawttu hi West Jaintia Hills niin 89.60% a tling thung.

Vote tla tlem ber district chu South West Khasi Hills niin 75.08% a tla a, East Khasi Hills district chu vote tlak tlem lamah pahnihna niin 79.82% a tla a ni.

Constituency vote tlak tamna ber chu West Jaintia Hills-a Mookaiaw-ah niin 93.21% a tla a, North Shillong constituency chu percentage-a chhuta vote tlak tlemna ber niin 69% a tla ve thung niin CEO chuan a sawi.

Vote hi naktuk zing dar 8 aṭanga chhiar ṭan tur niin district 11 leh Mairang leh Sohra civil sub-division-ah chhiar a ni ang.

CEO Kharkongor chuan West Jaintia Hills-a Kyndong Tuber polling station-ah March 1 khan vote thlak ṭhat leh tur a nih thu a sawi a, he chanchin ziah lai hian report hriat hman a ni lo a ni.

Kyndong Tuber-a vote thlak ṭhat a nih chhan hi inthlan laia khawl lamah buaina a awm vang a nih thu tarlan a ni bawk.

Kharkongor chuan report hi returning officer hnenah thehluh a nih tawh thu sawiin Raliang constituency-a dictrict election officer chuan election commission hnenah a thlen tawh tih a sawi.