Meghalaya : GNLA mi pakhat inpe

Meghalaya hel pawl Garo National Liberation Council (GNLA) mi pakhat chu Nilaini khan East Garo Hills Police kutah inpe in, GNLA commander-in-chief Sohan D Shira thah a nih lai khan an bula awm ve a nih thu police-te chuan an sawi.

Police kuta GNLA hel inpe hi Cherangre thingtlang khaw mi Panseng R. Sangma a nih thu sawiin Police-te chuan February 2-khan GNLA pawlah hian a inpe chauh tih an sawi. Nilaini tlai dar 4.30 velah khan Williamnagar SP kutah a inpe a ni.

SP Ringrang Momin chuan Panseng hi GNLA hardcore a nih loh thu sawiin an hotute rawngbawl saktu leh thawmhnaw suk sak tu mai a nih thu a sawi. Thu zawhfiah a nih hnuah Sohan D Shira thah a nih ni pawh khan a bulhnai lawkah a awm tih a sawi bawk.

Momim chuan Panseng hian Sohan thah a nih ni khan an pawl mi 11 dang nen an chhuah thu a sawi tih a tarlang a, ULFA’s second in command Drishti Rajkhowa pawh an zingah a tel ve tih a sawi thu a sawi bawk a ni.

SP chuan Sohan-a chhuahpui te hi inbual tura an kal laiin Sohan leh Panseng erawh hi chu an kal ve lo tih a sawi a, Panseng hian inthiar tura a kalsawn laiin silai puak ri a hre ta a, a hlauh avangin a tlanchhe ta niin a sawi bawk.