Railways in hmarchhakah huang a zauh dawn : Gohain
Union Minister Rajen Gohain chuan Ningani khan Railways in hmarchhak hmun hrang hrangah a huang zauh zel a tum thu a sawi.
Union Minister of State for Railways Rajen Gohain chuan Brahmaputra lui chunga dawh mek, Bogibeel Bridge chu May-June vela hawn a nih hunah Assam leh Arunachal Pradesh chuan an hlawkpui hle dawn nia sawiin Itanagar leh Eastern Arunachal district inkar chu a hnai hle dawn tih a sawi bawk.
Minister chuan 2018-19 Union Budget proposal-ah pawh Rangiya-Rangapara North-Harmutti-Naharlagun section line, km. 398-a thui chu electrification tura ruahman a nih thu a sawi a, he hna hi Central Organisation for Railway Electrification (CORE) in a thawh dawn thu a sawi.
Gohain chuan hmarchhak state zawng zawngte chu rel hmanga kalpawh theih vek an nih dawn thu sawiin, helam kawngah hian hma nasa taka lak a nih thu a sawi a, hetih lai hian Meghalaya-ah erawh state sorkar in railway tana ram a pek loh avangin hna an ṭan ve thei lo tih a sawi bawk.
Minister of State for Railways chuan Arunachal Pradesh sorkar chu compensation chungchanga buaina chinfel dan ngaituah vat turin a ngen bawk a, Assam-a Murkongselek leh Arunachal-a Pasighat inkara ram compensation vanga buaina chu chingfel vat turin a ti a ni.
Gohain hian Naharlagun-New Delhi Arunachal Express, Naharlagun railway station aṭanga a vai liamnaah thu sawiin he hunah hian Union Minister of State for Home Kiren Rijiju pawh a tel ve nghe nghe a ni.
Union Minister chuan rel kawng siam, km 24.36-a thuia hna thawh mekin compensation vanga buaina a tawk chu pawi a tih thu sawiin hna an thawh chhunzawm theih loh thu a sawi. Henglai vela ram nei tu ten compensation an ngiat tam lutuk vanga harsatna tawk an nih thu sawiin, Arunachal sorkar chu hma la turin a ngen a, Gohain chuan compensation an ngiat zat chu an project man ai pawhin a tam niin a sawi.
Gohain chuan Misamari-Bhalukpong-Tenga-Tawang line (378 km) line siamna tur cheng vaibelchhe 400 chu Railway Ministry in a sanction tawh thu a sawi a, hnathawhna tur survey an neih zawh hunah project report kimchang pawh buatsaih a nih tur thu a sawi a ni.