Assam CM leh BJP hruaitu dang lakah complaint thehlut

Assam-a eptu pawl, Assam Jatiya Parishad (AJP) chuan chief minister Himanta Biswa Sarma leh BJP hruaitu dang, central minister Sarbananda Sonowal leh Rameswar Teli-te chu Covid-19 kaihhruaina palzuta puhin an lakah complaint an thehlut.

AJP chuan Assam-a BJP-in 'Jan Ashirwad Yatra' an hmanaah hruaitute hian hri leng vanga kaihhruaina siamte chu an bawhchhia nia sawiin, police station hrang hrangah complaint hi an thehlut a ni.

Complaint hi Assam minister Bimal Borah leh Jogen Mohan, MP-te Kamakhya Prasad Tasa, Topon Kumar Gogoi, Dilip Saikia, Pallab Lochan Das, leh Queen Oja, BJP state chief Bhabesh Kalita bakah Kamrup Metropolitan Deputy Commissioner Biswajit Pegu lakah an thehlut bawk.

Dispur, Latasil leh police station dangah complaint hi thehlutin, "Assam state BJP-in Jan Ashirwad Yatra an buatsaihah khan, sorkar official tam tak chu Sarbananda Sonowal hmuakin an pungkhawm a ni. Hetihlai hian sorkarin hri leng vanga kaihhruaina a siamah mi 200 aia tam punkhawm a khap a ni," tiin complaint-ah hian a ziak.

AJP chuan dan an bawhchhiat avangin hming an tarlante chu thubuai siamsak tura an phut thu an ziak lang bawk.

August 17-a Assam State Disaster Management Authority-in thupek a tihchhuahah, open space-a meeting neihah mi 200 chin bak awm phal a ni lo a, hei bakah hian Kamrup Metropolitan district-ah district dang aṭanga luh leh chhuah khap a ni bawk.

Assam BJP hian Inrinni liam ta khan ni thum awh, Jan Ashirwad Yatra hi an buatsaih a, Guwahati aṭanga ṭanin, Yatra hi Morigaon, Kaliabor-ah neih a ni a, Pathianni khan Nagaon-ah neiiin nimin khan Jorhat leh Sivasagar-ah neih chhunzawm a ni.