Hri leng hian min kai harh a ni : AP CM

Arunachal Pradesh chief minister Pema Khandu chuan an state-a hripui leng chu state sorkarin kum tam tak a lo ngaihthah tawh, health sector tihchangtlun leh tuaitharna tura kai harhtu a nih thu a sawi.

"Hripui leng vang hian state sorkar chuan zirlai hautak tak a zir chhuak a, health sector chak leh changtlung zawk siam turin infrastructure-te pawh thuam ṭhat an ni," a ti.

Chief Minister chuan, "Hri leng hian kan tih dik lohte siamṭha thei turin min siam a, kum tam tak chhunga kan tih theih loh chu kum khat leh a chanve chhungin kan tih theih phah a ni," tiin a sawi. He thu hi Pathiannia Itangar-a Ramaskhishna Hospital-a khum 200 awmna tur speciality unit lungphum a phumnaah a sawi a ni.

Khandu chuan, "Chief Minister ka ni chungin a hma khan a bulṭhutah kan state health facility dinhmun dik tak hi ka lo ngaihtuah chiang ngai lo a ni. Mahse hripui a rawn len tak avangin state health sector dinhmunte enfiahin, level hrang hrangah meeting-te kan nei a, hetah hian health infrastructure lam ṭhat tawk lohzia pawh kan hre chho ta zel a ni," a ti. Theihtawpin health sector hmasawnna leh tihchangtlunna tura hma an lak nghal thu sawiin, district hospital tinah infrastructure leh facility-te siamṭhat a ni a, thawktu lam pawh mamawh ang zat lakbelh zel an nih thu a sawi bawk.

CM chuan sorkar chuan assembly constituency tinah hospital pakhat, facility ṭha tak nena thuam dah vek a tum thu a sawi.