Tripura Congress hotuin a banna hnukdawk

Tripura state Congress president Rijush Kanti Biswas chuan kar liam ta Inrinnia party president a nihna aṭanga banna a thehluh chu party thuneitu sang lamin an ngenna avangin a hnukdawk leh.

Rijush Kanti Biswa-a'n party president a nihna aṭanga banna a thehluh hnuah, Congress working committee member leh party Tripura in-charge Ajoy Kumar chuan biain, a banna thehluh hi hnukdawk rih turin a ngen. A ngen angin Pathianni khan Biswa hian a banna hi a hnukdawk leh nghal a ni. Kumar chuan August 29-ah Tripura tlawhin, a harsatna neih leh an party chungchangte an sawidun dawn tih a sawi a, Biswa chuan a mimal harsatna neihte aia party dinhmun ngai pawimawh a, Tripura unit hruaitu nih chhunzawm a remti chu lawmawm a tih thu a sawi bawk.

Biswa chuan Ajoy Kumar nen an inbiak hnuah a banna thehluh pawh a sut leh tih sawiin, "Harsatna ka neihte min chinfel pui a tiam a, hengte hi a ti thei a nih chuan TPCC chief nih chhunzawm zel hi a ka tan harsatna a awm hran lo a ni," a ti. Banna a thehluhna chhan chu puanzar a tum loh thu leh, a mimal thil vang a ni tih a sawi bawk. Banna a thehluh lai hian party dang a zawm dawn nia thuthang awm chu thu dik lo a nih thu leh, party president a nihna aṭangin banna a thehlut a, Congress chhuahsan a tum loh thu pawh a lo sawi tawh a ni.