Meghalaya police ralthuam bo : Wahumkhrah luiah an hmu

Meghalaya fire and emergency services department hnuaia search and rescue team (SRT)-te chuan nimin khan August 15-a Cheristerfield Thangkhiew thih dana lungawi lohna lantir a nih ṭuma hmai tuamte'n police ralthuam an laksak zawng zawng chu an hmu leh tawh.

Tualchhung chanchinbu Nongsaiñ Hima chuan Zirtawpni liam ta khan an hriat loh hnen aṭangin lehkha an dawng a, chutah chuan ralthuam awmna hi a inziak a ni.

Lehkha an dawna a inziah dan chuan August 15 khan lehkha thawntu leh a ṭhiante chuan Shillong-a Lawmali area-a rawlthar rualin ralthuam an lo leklang lai chu an hmu a ni. Khawia mi nge tih an zawh chian chuan Mawkynroh-a police kut aṭanga an lak a nih thu an hrilh niin a inziak.

"Kum lama upa zawk kan nih angin, chung naupangte chuan an hmang sual ang tih kan hlau a, an hnen aṭang chuan rang takin kan laksak nghal bakah rifle pathum chu Umpohliew Bridge-ah kan paih ta a ni," tiin a inziak a ni.

Minister leh MLA-ten hel pawl aṭangin sum phutna dawng
Meghalaya-a Hnyniewtrep National Liberaton Council (HNLC) helpawl hruaitu hlui, Cheristerfield Thangkhiew kahhlum a nih hnuah, state minister leh MLA ṭhenkhat chuan helpawl hnen aṭang hian sum pe tura phutna an dawng.

Deputy chief minister Prestone Tynsong chuan an mobile phone-ah text message hmangin sum pe tura phutna hi an dawn thu sawiin, helpawl hian cheng nuai 10 leh a aia tam income tax anga pe turin an phut tih a sawi. Hemi chungchang hi police-ten an chhui zui mek thu a sawi.