Hmarchhak state pathum inthlan result puang ta Tripura-ah BJP che ṭha!

Hmarchhak state pathum - Tripura, Nagaland leh Meghalaya assembly inthlan result chu Inrinni khan puan a ni ta a, Tripura-ah mite mak tih khawpin central-a sorkarna siamtu Bharatiya Janata Party (BJP) leh a thurualpui, Indigenous People's Front of Tripura (IPFT)-ten chiang takin hnehna an chang a ni. Nagaland-ah pawh BJP leh a thurualpui National Democratic Progressive Party (NDPP)-te chu an che ṭha hle a, sorkarna siamthei dinhmunah an ding mek bawk. Hetih lai hian Meghalaya-ah erawh BJP hi an che chhe hle a, Congress leh National People's Party (NPP)-te chu vote hmu ṭha ni mah se party mala sorkarna siam tur khawp seat an la lo ve ve thung. Nagaland leh Tripura-ah hian Congress an che chhe hle a, seat pakhatah mah hnehna an chang lo a ni.

Tripura :
Tripura-ah hian rorel lai Communist party of India- Marxist (CPI-M) chuan sorkarna an siam thei tawh dawn lo tih a chiang hle a, seat 16-ah chiah hnehna an chang.

Hetih lai hian BJP leh a thurualpui IPFT-te chuan beisei phak bakin hnehna an chang chiang a, BJP hian seat 35-ah hnehna changin IPFT hian seat 8-ah hnehna an chang thung a, an pahnih ṭangrual hi chuan seat 43-ah hnehna an chang.

Seat 60 awmna Tripura state assembly inthlanah hian BJP hian seat 51-ah candidate an nei a, IPFT hian seat 9-ah candidate an nei ve thung. CPI-M-te erawh hi chuan seat 56-ah candidate an nei thung.

CPI-M hian Tripura-ah hian kum 25 zet ro an rel tawh a, tun assembly term zawh aṭang hi chuan kum tam tak sorkarna an siam tawh chu a tawp ve tawh hrih dawn ta a ni. BJP National President Amit Shah-an "Tripura mipuite tan Left sorkarna hi a dik lo a ni", a tih chu a taka chantirin sorkarna an siam dawn tih a chiang ta hle a ni.

Tripura BJP President Biplap Kumar Dep chu Chief Minister a nih rin a ni a, Banamalipur constituency-ah thlan tlin a ni.

CPI-M thurualpui party - CPI, Forward Bloc leh Revolutionary Socialist Party-te chuan seat pakhatmah an la lo bawk a ni.

Kum 20 lai Chief Minister ni tawh Manik Sarkar-a dinna constituency Dhanpur-ah erawh BJP-ten complaint an thehluh avangin vote chhiar lai tihtawp a ni a, hei hian inhnialna nasa tak a chawkchhuak thung.

Charilam constituency-ah erawh chuan March 12 hian inthlanna an nei ve dawn chauh a, March 15 hian vote chhiar a ni ang.

BJP hian 2013 inthlanah khan vote zawng zawng zinga 1.5% chiah an hmu thei a, tun ṭumah erawh nasa taka hma sawnin sorkarna an siam thei dawn ta thung a ni.

Tripura-ah hian BJP hian ṭan an la nasa hle a, February 18-a inthlanna neih a nih hma lawk karah khan Prime Minister Narendra Modi pawh vawi hnih lai campaign neiin a kal a, Party President Amit Shah bakah party hruaitu dang eng emaw zat pawh campaign nei tur hian an kal fo a, anni bakah hian state ṭhenawm Assam Chief Minister Sarbanada Sonowal leh Uttar Pradesh CM Yogi Adityanath-te pawh BJP tana campaign tur hian an kal a, an campaign thawh rah an seng ta niin a lang.

Narendra Modi chuan inthlan result a hriat hnu lawkah hian thuchhuah siamin Karnataka, Kerala, West Bengal leh Odisha-ah ram lak an la ngaih thu a sawi a ni.

Party hrang hrang seat lak dan chu hetiang hian a ni: CPI(M)- 16, Congress- 0, BJP- 35, IPFT- 8.

Nagaland :
Kristian tamna state, Nagaland-ah pawh hian BJP leh a thurualpui NDPP-te chu an che ṭha thawkhat hle a, Congress erawh an che chhe hle thung.

BJP hian seat 20-ah candidate neiin seat 12-ah hnehna an chang thei a, NDPP hian seat 40-ah candidate neiin seat 17-ah hnehna an chang thei bawk a ni. BJP leh NDPP party ṭangrual hian seat 29-ah hnehna an chang a, sorkarna siam turin seat khat chiah an mamawh tawh a ni.

Sokarna chang lai Naga People's Front (NPF) chuan seat 26-ah hnehna changin sorkarna an siam phak lo bawk.

Nagland-ah hian he chanchin ziah lai hian sorkarna siam tur la chiang lo mah se Independent candidate - Tongpang Ozukum chuan Neihpiu Rio a thlawp dawn nia sawi a ni a, hemi a nih chuan BJP leh NDPP ṭangrual te hian sorkarna an siam thei dawn a ni.

Hetih lai hian NPF-te chuan sorkarna siam an tum hle tho a, party tenau dang te an be mek niin report ṭhenkhat chuan an tarlang thung.

BJP-NDPP ṭangrual hian sorkarna an siam thei a nih ngat chuan NPF in kum 15 chhung sorkarna an siam tawh chu an pawtchat dawn a ni.

Nagaland hian February 27 khan Assembly inthlanna hi an nei a, constitu­ency 60 awmah 59-ah inthlanna neih a ni a, Northern Angami -II constituency-ah NDPP hruaitu Neiphiu Rio chu chuhpuitu a awm loh avangin he constituency-ah hian inthlanna neih a ni lo thung. BJP-NDPP ṭangrual hian sorkarna an siam a nih chuan vawi thum lai Chief Minister lo ni tawh Neiphiu Rio hi chief minister tura rinkai ber a ni bawk.

Nagaland hian inthlan dawn hnaiah buaina neuh neuh tawkin inthlan boycott tumna hial awm mah se inthlanna hi kaltlang pui a ni ta tho a, Congress party chuan seat pakhatmah an la lo bawk a ni.

Nagaland Assembly inthlana Party hrang hrang seat lak dan chu hetiang hian a ni: BJP- 12, NPF- 26, Janata Dal (United)- 1, NPP- 2, NDPP- 12 leh Independent- 1. Inthlan result leh report kimchang hi Election Commission of India hnenah thehluh tawh a ni bawk.

Meghalaya :
Kristian tamna state tho Meghalaya-ah erawh state dang aiin Congress an che ṭha a, mahse sorkarna erawh an siam phak lo thung.

Meghalaya-ah hian eng party mahin seat 30 an la phak lo a, sorkarna siam tur chuan seat 30 tal mamawh a nih bawk si avangin sorkar tur a la chiang lo a ni.

Congress chuan seat la hnem berin seat 21-ah hnehna an chang a, NPP in dawtin seat 19-ah hnehna an chang thung a, BJP hian ṭan nasa takin la mah se seat 2-ah chiah hnehna an chang thei a ni.

BJP hian nasa takin ṭan la in seat 47 laiah candidate nei mah se seat hnihah chiah hnehna an chang thei thung a, hetih lai hian North East Democratic Alliance (NEDA) anga a thurualpui United Democratic Party (UDP) chuan seat 6-ah hnehna an chang thung.

NPP hian BJP-UDP ṭangrual hi an thawhpui rin a ni a, mahse thawk ho pawh nise sorkarna an la siam phak dawn loh avangin party tenau zawk PDF, HSPDP leh independent candidate-te an thawhpui tel a ngai dawn a ni.

Hetih lai hian Congress chuan beidawn an tum lo hle a, Pine Wood hotel, Shillong-ah party hruaitute inko khawm nghalin hmalak zel dan tur an rel nghal a, he thuziah lai hian an thurel an la puangzar lo a ni.

NDPP, BJP, UDP leh party tenau dangte hi an thawk ho a nih chuan sorkarna an siam thei dawn a, hetiang hi a thleng a nih chuan kum 10 lai sorkarna siam tawh Congress sorkarna chu an pawtchat dawn tihna a ni thung.

Meghalaya Assembly inthlanna hi Februaty 27 khan neih niin seat 60 a awm a, seat 59-ah inthlanna hi neih a ni thung. Williamnaga constituency-a NCP candidate Jonathone N. Sangma thah a nih avangin Williamnagar constituency-ah hian inthlanna neih a ni ve lo a ni.

Chief Minister Mukul Sangma chu a dinna constituency pahnih - Ampati leh Songsak constituency-ah te hnehna a chang ve ve a ni.

Prime Minister Narendra Modi pawh vawi hnih lai campaign in kal mah se Meghalaya-ah chuan BJP thlipui a tleh vak hleithei lo a, vawi eng emaw zat Congress leh Chief Minister Mukul Sangma chu nasa takin bei mah se Congress chuan seat eng emaw zat an la la thei tho thung.

Party hrang hrang seat lak dan chu hetiang hian a ni: Congress- 21, UDP-6, BJP- 2, OTH- 9.