Meghalaya-ah sorkarna siam tur la chiang lo

Meghalaya assembly inthlan result kar kalta Inrinni-a puan takah khan party mala sorkarna siam phak an awm lo a, he chanchin ziah a nih lai thleng hian sorkar thar siam tur a la chiang thei lo a ni.

Meghalaya Assembly-ah hian seat 60 awmin seat 59-ah inthlanna neih a ni a, rorel lai Congress chuan seat la hnem berin seat 21-ah hnehna an chang a, heti chung hian sorkarna siam tur chuan seat 10 an la mamawh belh thung. Hemi a nih avang hian party tenau dang sorkarna siampui tur an dap mek tih Chief Minister Mukul Sangma chuan sawiin, common agenda an neihpui theih tur, mipuite lungualna thlenpui thei tur party thurualpui tur an zawn mek thu a sawi.

Sangma hian a zawna term nga hnehna a lo chan tawhna Ampati constutuency-ah hnehna a chang leh a, hei bakah hian Songsak constituency-ah National People’s Party (NPP) candidate Nihim D. Shira hnehin seat a la bawk.

CM chuan regional party-te chuan thurualpui an la neih loh thu sawiin Bharatiya Janata party (BJP) emaw NPP emaw pawh an la thawhpui lo niin a sawi.

Congress hian Meghalaya-a sorkarna an siam theih nana hma la tur hian an senior leader pahnih Ahmed Patel leh Mukul Wasnik-te an tirchhuak tawh a ni.

Hetih lai hian NPP chu seat la hnem ber dawttu niin seat 19-ah hnehna an chang a, NPP hian sorkar laipui, Rajasathan leh Manipur-ah BJP thurualpui mah se Meghalaya-ah erawh hi chuan thurualpui an nei lo thung.

NPP President Conrad K. Sangma chu Shillong-ah regional party-te be turin a kal tawh a, United Democratic Party (UDP), Hill State People’s Democratic Party (HSPDP), People’s Democratic Front (PDF), Bharatiya Janata Party (BJP), Nationalist Congress Party (NCP) leh Khun Hyniew­trep National Awakening Move­ment (KHNAM)-te thurualpuiah sawm a tum a, Congress paih­thlak an tum hle a ni.

UDP leh HSPDP-te hi ṭang­rual in seat 6 leh seat 2 an la a, party thar PDF hian seat 4 la an la thung a, BJP erawh hi chuan seat hnihah chiah hnehna an chang thung a ni. NCP leh KHNAM-te hian seat khat ve ve la in Independent-a tling mi pathum an awm bawk.

UDP leader Metbah Lyngdoh chuan regional party-te hian thawh ho an tum thu sawiin Pathianni tlaiah khan meeting pawh an nei tawh nghe nghe a ni.

BJP Secreatry General incharge of Meghalaya, Nalin Kohli chuan mipuiin Congress sorkar an nin tawh thu a sawi ve bawk.

Assam Finance, Health and Education Minister leh Northeast Democratic Alliance (NEDA) convenor ni bawk Himanta Biswa Sarma pawhin Me­ghalaya-ah BJP leh a thu­rualpui-ten sorkarna an siam dawn tih a sawi a, BJP-te chuan regional party-te an ṭanpui dawn thu leh sorkarna an siam ngei dawn thu a sawi ve bawk a ni.