Meghalaya Chief Minister thar Conrad Sangma

Meghalaya chuan Nimin khan Chief Minister thar an nei ta a, National People’s Party (NPP) president Conrad Sangma chu Meghalaya Chief Minister 12-na ni turin zing dar 10.30-ah khan Raj Bhavan, Shillong-ah Governor Ganga Prasad chuan rinawmna thu tiamtirin a lalut a ni.

Meghalaya-ah hian NPP hi party mala seat la hnem ber ni lo mah se tualchhung party United Democratic Party (UDP), People’s Democratic Front (PDF), Hill State People’s Democratic Party (HSPDP)-te bakah Bharatya Janata Party (BJP) leh Independent MLA pakhat thawhpuiin sorkarna hi an siam thei ta a ni. Conrad Sangma hian thlawptu MLA 34 a nei niin report chuan a tarlang.

NPP leh a thuralpui te hi Meghalaya Democratic Alliance (MDA) tih an ni. Inthlan­ah khan NPP hian seat 19-ah hnehna an chang a, UDP hian seat 6 la in, PDF hian seat 4 an la thung a, HSPDP hian seat 2 la in BJP pawhin seat 2 an la ve bawk. Congress chuan bial 21-ah hnehna chang mah se sorkarna hi an siam pha ta lo a ni. Governor Ganga Prasad chuan Conrad Sangma hi Pathianni khan sorkarna siam turin a sawm tawh a, Nimin khan Chief Minister thar atan hian an lalut ta a ni.

Conrad Sangma hi kum 40 mi niin 2016-a boral ta, Lok Sabha speaker P.A Sangma fa naupang ber a ni nghe nghe a, a pa boral hnuah hian Tura constituency by-election-ah thlan tlin a ni bawk.

Chief Minister thar lakluhna inkhawmah hian Union Home Minister Rajnath Singh leh BJP President Amit Shah-te pawh an tel a ni. Chief Minister thar lakluh a nih rual hian Minister dang 11 pawh lakluh ve nghal an ni bawk a, Meghalaya hian Deputy Chief Minister an nei dawn lo thung a ni.