Nagaland Legislator 75% Crorepati, Criminal Record nei 2

Association for Democratic Reforms (ADR) in Pathianni-a report a tarlanah chuan Nagaland Legislator tur thlan thar zinga 75% chu mi hausa tawntaw crorepati an ni tih tarlan a ni. Hemi awmzia chu legislator 60 zinga 45 chu crorepati an ni tihna a ni. 2013 Assembly inthlanna a thlan tlin zinga 61% kha crorepati an ni thung.

Legislator tur thlantlin thar zingah hian criminal record nei pahnih awmin, Bharatya Janata Party (BJP) leh Nationalist Democratic Progressive Party (NDPP) Legislator an nih thu report chuan a tarlang. ADR chuan Legislator parukin an pawisa lakluhna an tarlan loh thu sawiin hmeichhe legislator an awm loh thu an sawi bawk. Nagaland Assemnbly election 2018-a legislator-te sum neih zan chawhrual hi cheng vaibelchhe 5.16 a ni.

NPF Legislator 27-te sum neih zat chawhrual hi cheng vaibelchhe 4.41 a ni a, NDPP Legislator 12-te sum neih zar chawhrual hi cheng vaibelchhe 7.52 niin BJP Legislator 12-te sum neih zat chawhrual hi cheng veibelchhe 3.68 a ni thung.

Legislator sum ngah zual zingah hian vawi thum lai chief minister lo ni tawh Neiphiu Rio hming pawh langin cheng vaibelchhe 36-a nei a, NDPP Legislator tho K. Tokugha Sukhalu chuan cheng vaibelchhe 17 neiin NPF mi Yitachu pawhin cheng vaibelchhe 17 vel a nei nia sawi a ni. Hetih lai hian NDPP Legislator Toshi Wungtung chu sum nei tlem ber niin cheng nuai 9 a nei thung a ni.

Thiamna lamah chuan legislator 39 chuan graduate leh a chunglam an ni a, legislator 20 te chu pawl 8-12 inkar niin, ziak leh chhiar thiam lo in report pakhat a awm bawk.