Nagaland : BJP-in NPF an thlawpna titawpin NDPP thlawhpui

Nagaland-ah chuan Bharatya Janata Party (BJP) ten inthlan hma aṭanga an thurualpui Nationalist Democratic Progressive Party (NDPP) nen ṭangruala sorkar an siam dawn tih Thawhṭanni khan an sawi.

BJP hruaitu leh Assam Finance Minister ni bawk Himanta Biswa Sarma chuan NDPP hruaitu, chief minister pawh vawi thum lai lo ni tawh Neiphiu Rio nen meeting an neih zawh hnuah Nagaland-a sorkarna chelh mek Naga People's Party (NPF)-te nen an ṭan thawh hona a tawp tawh thu media hmaah a sawi a ni. Biswa Sarma chuan NPF nen inzawmna an neih tawh loh thu a sawi bakah, NPF chu sorkarna siam turin an thurualpui dawn lo tih a sawi nghal a, NDPP-te nen an thawhho tawh dawn thu a sawi. BJP leh NPF hi kum 15 lai an thawkho tawh a ni.

NDPP hi inthlan hma lawka din chauh kha niin, party naupang tak ni mah se tun inthlanah khan seat 17 an la a, BJP hian seat 12-ah hnehna chang bawkin, party pahnih ṭangrual hian sorkarna siam tura seat mamawh zat, seat 31 chu an tlin tawh a ni. BJP-NDPP ṭangrual pawl hi JD(U) MLA pakhat leh Independent Legislator pakhatin an thlawp bawk a, sorkarna siam tur khawp MLA chu an nei tawh. Sarma chuan CM ni lai TR Zeliang chu inhnukdawk tawh mai tura chahin, inhnukdawk tawh mai se a ṭhat zawk tawh tur thu a sawi. He thuziah lai thleng hi chuan Zeliang-a hian banna a la thehlut lo thung.

Hetih lai hian NPF hi party mala seat la hnem ber niin seat 27-ah hnehna an chang thung a, Pathianni khan NPF hian thuchhuah siamin BJP nena an thawh hona chungchangah central lama BJP hotute biak an tum thu an la sawi a, sorkarna siam an la tum hle a ni. NDPP hotupa Neiphiu Rio chuan BJP leh NDPP inremna siam chu tun dinhmunah tlangzarh theih a la nih loh thu sawiin an party ṭangrual pawl hi 'People’s Democratic Alliance' tia a hming vuah an tum thu erawh a sawi.

Pathianni khan Rio leh Zeliang-te hian Governor P B Acharya hmuin an party pahnih hian sorkarna an siam theih thu an sawi ve ve a, Governor hi an dinhmun tichiang turin darkar 48 hun a lo pe ve ve a ni. Nagaland hian February 27 khan inthlanna neiin, Constutuency 60 awmah 59-ah inthlanna hi an nei a, Northern Angamy-II constituency-ah bih chuan Neiphiu Rio chu chuh­puitu awm loin a tling a ni.