Vawiin aṭangin Tripura-ah college leh school hawng dawn

Tripura sorkar chuan state chhunga hri leng dinhmunin ziaawm lam a pan chhoh avangin vawiin aṭangin college leh school, class 6-12 chin a hawng dawn.

Thawhṭanni khan school education director chuan zirna in hawn a nih tur thu hi sawiin, "Hri kai thar an tlakhniam tak zel avangin, State Disaster Management Authority pawmpuina angin department of education (School) chuan class 6-12 zirlaite tan August 25 aṭangin physical neih ṭan a rel a ni," a ti.

He thupek hian sorkar school bakah, government-funded, private school leh madrasa-te a huam vek a ni.

Zirna in hrang hrangah hian Covid kaihhruaina siamte chu khauh taka kenkawh vek tura tih a ni. School-ah classroom an indaih tawk lo a nih pawhin, shift hnihin zitirna chu kalpui tura tih a ni bawk. Shift hniha kal ngaite tan zing dar 8-11 leh, chawhnu lama chhun dar 12-tlai 3 inkarah an inkal chhawk ang. Zirtirtute erawh an vaia kal ziah tura tih an ni thung.

Class 1-5 inkarte chu school kaltir an la ni ve dawn lo.

School-ah hian mask vuah leh social distancing dante ṭha taka zawm tura tih an ni a, faina lam ngai pawimawh tura tiin, district education officer-te chu school endiktu tur team ruat vek tura tih an ni bawk.

Meghalaya : Sept 1-a zirna in hawn rawt
Meghalaya education depart­ment chuan an state chhunga hri lengin ziaawm lam a pan chhoh avangin chief minister Conrad K Sangma kaihhruai committee hnenah September 1 aṭanga zirna in, school leh college-te hawn an rawt.

Education minister Lakhmen Rymbui chuan hun rei tak hri leng vanga zirna inte khar a nih hnuah, classroom teaching chu a theih anga hmaa kalpui a ngai tawh tih a sawi. Online class chu kalpui ni reng mah se, zirlaiten classroom-a zirna an dawn nen a inang thei lo a ni, a ti.

Rymbui chuan education department chuan urban leh rural area-ah college leh school, class 9-12 chin chu September 1 aṭanga hawn tawh tura an rawt thu a sawi a, urban area bikah class 6-8 chu school tlawh phalsak leh, class 1-5 erawh chu online teaching la kal chhunzawm an rawt bawk tih a sawi.

Covid-19 hri leng vangin nikum March thla khan state chhunga zirna in hrang hrangte chu khar an ni a, kumin kumtir lam khan hun rei vak lo hawn hman ni mah se hri leng thawh hnihna thleng vangin khar chhunzawm leh nghal an ni.