AP aṭanga sawnchhuah tumna Chakma leh Hajong-ten duh lo
Arunachal Pradesh chief minister Pema Khandu leh union law minister Kiren Rijiju-ten Arunachal Pradesh-a Chakma awmte chu dan loa awm ni a sawi a, state danga sawn chhuah an tum chu Chakma leh Hajong-te chuan an sawisel.
Chakma Development Foundation of India (CDFI) chuan Thawhṭanni khan prime minister Narendra Modi, union home minister Amit Shah, Rashtriya Swayamsevak Sangh (RSS) chief Mohan Bhagwat bakah Arunachal Pradesh leh Assam chief minister-te hnenah lehkha thawnin, he ruahmanna hi an duh loh thu an thlen.
Hruaitu hrang hrang hnena lehkha an thawnah hian, kumin Independence Day lawmnaa AP CM Khandu-a'n thu a sawiah khan Chakma leh Hajong hnamte chu Arunachal pawn lamah sawn chhuah an ni dawn tih a sawi a ni, an ti. Hei bakah hian union law minister Kiren Rijiju pawhin public meeting-ah heng hnam pahnihte hian Arunachal an chhuahsan a ṭul tih a sawi bawk a ni, an ti.
"He thil hian hnam hrang hrangte inlungrual tawnna a tichhia a, Chakma leh Hajong hnam huatna a siam bakah, Chakma leh Hajong hnamten hlauthawnna nasa tak an neih phah a ni," tiin an sawi.
Chi inthliarna a nasa tih sawiin, kum 1996 leh 2015-ah Supreme Court-in thupek lo tichhuak tawh mah se, kum 1964 aṭanga Aruanchal Pradesh-a khawsa, Chakma/Hajong mi 15,000 dawnte chu India khua leh tui nihna tun thlengin pek an la ni lo, an ti. Pem lutte thlah, state chhunga piang ngeite pawh voter list-ah telh a ni lo tih an sawi bawk.
State pawna Chakma leh Hajong-te sawnchhuah tuma hmalakna reng reng chu an dodal zel dawn tih an sawi. Heng hnam hnihte hi AP aṭang hian Assam lamah sawn chhuah an tum nia sawi a ni.