Assam police-ten Meghalaya mi 3 kutthlak : Tualchhung miten Assam Police check gate tichhia

Assam leh Meghalaya sorkarin ramri chungchanga buaina an neihte chinfel dan kawng an ngaihtuah mek laiin, Thawhṭanni zan khan Meghalaya-a Ri-Bhoi district-ah Assam police-ten tualchhung mi pathum kut an thlak nia sawi a ni a, hei vang hian an khaw chhung mipuite chuan lungawi lohna an lantir nghal.

Report chuan Umlaper khuaah Assam police-te hian Mawlasnai aṭanga haw tlangval pathum chu kut an thlak a, pahnih chuan hliam na tak an tuar a, pakhat erawh hliam tuar loin a tlanchhe hman nia sawi a ni.

He thil thleng hian tualchhung mite a ti thinur hle a, Umlaper, Ummat leh Pdengtleit khaw mite chuan Umlaper khuaa Assam police camp chu beih an tum a, police-ten temporary check gate an siam pawh an tihchhiat sak a ni. Mahse Assam-a West Karbi Anglong leh Meghalaya-a Ri Bhoi district official-te an inrawlh hnuah an buaina nasa zawk chhuak loin an chingfel thei ta a ni.

Umlaper khaw mite chuan an khaw huam chhunga Independence Day hmaa Assam police-ten temporary camp an siam chu an duh loh thu sawiin, an camp hi hmun danga sawn turin an phut bawk. Hei hi Assam police-te pawhin an remti tawh bawk.

Ri-Bhoi district-a Umsning block huam chhunga awm, Umlaper khua hi Assam leh Meghalaya border area-a awm niin, hei hi state pahnihten ramri buaina an neihna zinga mi a ni.